تحوّل محمد الشرنوبي إلى حديث الجمهور مع أحدث ألبوماته «بعد الليل»، ليس فقط بسبب الموسيقى الجديدة، وإنما بسبب التغيير الجذري الذي اختاره في شكله وشخصيته الفنية.
من الشعر الأشقر القصير، إلى ستايل الملابس والرقص، وصولاً إلى خسارة نحو 13 إلى 14 كيلوغراماً، قدّم الشرنوبي نفسه بصورة مختلفة تماماً عن الـلوك الكلاسيكي الذي اعتاد الجمهور رؤيته به منذ بداياته.
محمد الشرنوبي يكشف سبب الـTransformation
عن ردود الفعل على التغيير، يقول محمد الشرنوبي لـ ET بالعربي: «شفت الفيدباك حلو قوي الحمد لله، مبسوط جداً وحاسس إن أنا تعبي ما رحش في الأرض وإن ده أهم حاجة. طبعاً كان فيه ناس مخضوضة».
ويضيف: «متفهم جداً الخضة اللي عند الناس، بس يعني بطلب منهم إنهم يركزوا في الكونتنت ده اللي أخد وقت أطول ومجهود أكبر، فده ده اللي بجد مستاهل إنه يتسمع ويتقيم كويس».
ويؤكد أن التغيير في مظهره لم يكن مجرد خطوة شكلية، قائلاً: «فكرة إني عملت شعري أصفر وغيرت طريقة لبسي واجتهدت على إن أنا أعمل شكل جسمي كويس وكل الحاجات دي كانت جزء من الشغل اللي بشتغله على نفسي وجزء من الاكتشاف اللي بكتشفه لنفسي».
وعن خسارة الوزن، يكشف: «خسيت تقريباً من أول رمضان لحد شهر ٦ أو ٧، خسيت مثلاً 13 - 14 كيلو، إزاي بقى أكل بقى وتمرين ونوم».
«المطرب الحبوب».. صورة أراد الشرنوبي الخروج منها
الشرنوبي الذي ارتبط في بداياته بصورة المطرب الكلاسيكي صاحب الإطلالات الأنيقة والبدلات، يرى أن هذه الصورة حاصرته لفترة.
ويشرح: «أنا في الأول اتزنقت في الحتة بتاعة المطرب الحبوب الخلوق المؤدب اللي بيلبس بدلة جميلة».
ويتابع: «والحقيقة إن ده مشان، يعني أنا في الآخر عايز أهزر وعايز ألعب وعايز أجرب حاجات جديدة وعايز أكتشف حاجات جديدة».
كما يرى أن أعماله التمثيلية ساهمت أيضاً في تكوين صورة أكبر سناً عنه لدى الجمهور، موضحاً: «وفجأة بسبب الطريقة اللي كنت بغني بيها قبل كده الناس كانت فاكرة إن أنا عندي مثلاً 40، 45 سنة».
«مش عايز أكون بغني في الأوبرا»
اليوم، يريد محمد الشرنوبي أن يعكس في فنه شخصيته الحقيقية، بعيداً عن الصورة التي ارتبط بها لسنوات.
ويقول: «بسبب التمثيل برده، لأني عملت أدوار شوية كبيرة قوي وبتاع، فكنت عايز بس أعمل حاجات شبه سني دلوقتي اللي هو 30 سنة، شاب في مقتبل عمره».
ويضيف: «هبتدي أكون شاب عادي، مش عايز أكون بغني في الأوبرا ومش عايز أكون لابس بدلة وواقف قدام مايك ومش عارف أتحرك، مش عارف أخد راحتي ومش عارف أخد مساحتي».
ويعتبر الشرنوبي أن المرحلة الماضية كانت بمثابة رحلة لاكتشاف نفسه وقدراته، قائلاً: «فكنت بكتشف نفسي الفترة اللي فاتت دي، كنت بكتشف نفسي وبكتشف أنا أقدر أعمل إيه وبتعلم حاجات جديدة، فممكن عشان كده كان الموضوع بيخض شوية».
محمد الشرنوبي: «عايز أعمل مزيكا شبه طاقتي وشبه شخصيتي»
التغيير لم يتوقف عند الشكل، بل امتد إلى الموسيقى أيضاً.
ويقول الشرنوبي: «أنا مش بني آدم هادي يعني، أنا بني آدم بحب ألعب وبحب أهزر وبحب أنطلق، فكنت عايز أعمل مزيكا شبهي، مزيكا شبه شوية طاقتي وشبه شخصيتي».
وللوصول إلى هذه الهوية الجديدة، بدأ العمل على الألبوم منذ عام 2022، في رحلة استغرقت سنوات من التجربة وإعادة المحاولة.
ويكشف: «أخد مني مجهود كبير قوي واجتهدت كتير قوي عشان أعرف أوصل للتركيبة بتاعة إن أنا أعرف أطلع أغنية لوحدي، حتى لو بصيت في الكريديتس بتاعة الألبوم هتلاقيني عامل حاجات كتيرة قوي في الألبوم».
3 ألبومات خلال 4 سنوات!
رحلة التحضير لـ«بعد الليل» لم تكن سهلة، إذ جرّب الشرنوبي أكثر من نسخة قبل الوصول إلى الشكل النهائي.
ويقول: «قعدت واحدة أجرب وأعمل أغنية وأرميها، وأعمل أغنية وأرميها، وأعمل ألبوم وأرميه. عملت تقريباً ثلاث ألبومات في الأربع سنين دول».
ويضيف: «وقعدت تاني يعني بالضبط واختاروا عيد وهي كانت عاملة زي الروبيكي وباللي أنا عملت بيها التيزر بالضبط، ليه ومش ضابطة؟ أرمي، مش ضابطة؟ أرمي، لحد ما حسيت وحسينا كلنا، كل الناس اللي اشتغلت على الألبوم، إنها أوكي إحنا كده وصلين لحاجة لذيذة دي اللي هنبدأ بيها النيو فيرجن».
«النيو فيرجن».. طريقة مختلفة لصناعة الأغاني
مع الهوية الجديدة، اختار الشرنوبي أيضاً طريقة مختلفة في تسجيل وتنفيذ أغنيات الألبوم.
ويكشف أن معظم الأغاني تم تسجيلها في منزله: «فكرة إن أنا ألبوم كله تقريباً، اللي فات الألبوم كله ما عدا أغنية، أنا مسجله عندي في البيت في الأوضة. وقت ما بحب أغني بدخل أغني، ما عدا أغنية عملوها سجلتها عند إسماعيل نصرت، الباقي كلهم سجلته في البيت».
ويضيف: «فحتى الصناعة يعني الكلام ده في الصناعة والكلام ده كمان في الغنى، لقيت طريقة أعرف أرتاح فيها».
ويبدو أن هذه الطريقة انعكست على شعوره تجاه الموسيقى نفسها، إذ يقول: «أنا شغف دي في حد ذاتها حاجة بالنسبة لي كبيرة قوي وحاجة مخليةني مرتاح وسعيد وأنا بشتغل، أنا بقيت بتبسط وأنا بعمل الأغاني وحسيت إن أنا لقيت نفسي وحسيت إن أنا مبسوط في النسخة دي مني».
وبين الشكل والموسيقى وطريقة العمل، يبدو أن «بعد الليل» يمثل بالنسبة لمحمد الشرنوبي أكثر من مجرد ألبوم جديد، بل بداية لمرحلة فنية مختلفة، يحاول من خلالها الاقتراب أكثر من شخصيته الحقيقية وتقديم نسخة يشعر أنها تشبهه بالفعل.
