مع اقتراب التحضيرات للموسم الرمضاني المقبل، تتجه الأنظار إلى التعاون الجديد الذي يجمع ماغي بوغصن والكاتبة نادين جابر في مسلسل "الرّيسة"، بعدما قدّما معاً عدداً من الأعمال الناجحة خلال السنوات الماضية.
وفي لقاء خاص مع إيلي من ET بالعربي، تحدثت ماغي بحماس عن هذا المشروع، مؤكدة أن العمل يحمل تحدياً مختلفاً لها، كما يكشف وجهاً جديداً في مسيرتها الفنية.
مسلسل "الرّيسة" يجمع ماغي بوغصن و نادين جابر من جديد في رمضان 2027
"الرّيسة" تجربة مختلفة وشخصية شعبية جديدة
عن عودتها للتعاون مع نادين جابر، قالت ماغي: "أكيد مع نادين عملنا نجاحات كثيرة، وإن شاء الله حنعمل نجاحات كثيرة. هي من الناس اللي بتعرف تستفزك بالمسلسلات وبالأدوار. عاملين شيء كثير جديد، وحتى نادين حابة تقدم حالها بشيء جديد. مسلسل شعبي، والكاركتر يلي أنا بدي ألعبه كثير مبسوطة فيه، لأنه جديد بالنسبة إلي وتحدٍ جديد."
وعندما سألها إيلي إن كانت ستطل هذه المرة بشخصية فتاة شعبية، أجابت ضاحكة: "إيه، يعني بفيق من النوم، بغسل وجهي، وبوقف قدام الكاميرا. لا براشينغ ولا ميك أب. بالأول نقزت شوي، بس بعدين قلت لا، أنا كيف بدي قدم شيء جديد؟ كيف بدي كون ماغي الممثلة يلي مش مقدمة حالي إنه لازم اهتم بالبيوتي."
الناس بتحب البساطة وبتحب تشوف الممثل على طبيعته
وخلال الحديث، أشار إيلي إلى أن الجمهور تفاعل سابقاً مع أجواء الحي الشعبي في أعمالها، وكان ينتظر تلك المشاهد بشكل خاص.
وردّت ماغي موضحة: "هون أكثر، بتعرف ليش؟ لأنه الناس ببساطة. مش كله كله، يعني قسم كبير منه ناس بتحب البساطة، وبس تحب ممثل بتصير تحبه على طبيعته."
من يشارك ماغي بوغصن بطولة "الرّيسة"؟
أما عن أبطال العمل، فاكتفت ماغي بالكشف عن بعض التفاصيل من دون حرق المفاجآت، وقالت: "كثار حلوين."
وحين سألها إيلي إن كانت البطولة ستكون نسائية أم رجالية، أجابت: "نسائية، وأكيد في أبطال رجال. كلنا أبطال. السنة مثل كل سنة، كلنا بنكون أبطال. ما في بطولة فلان وفلانة، لا. كل حدا عنده خطه. بس كثير متنوع السنة، وكثير في أبطال وفي بطلات."
وأضافت أيضاً: "في شخصيات جداد معنا السنة. كثير مبسوطة إنه رح نكون سوا. عيني عليهم من زمان، وهلأ إجت الفرصة إنه نكون سوا." وعندما حاول إيلي انتزاع اسم أحد المشاركين، اكتفت ماغي بإعطاء تلميح واحد فقط، قائلة: "نون." ليختتم إيلي الحوار ممازحاً الجمهور: "وإنتو قدروا واعرفوا مين."
