بعد 15 سنة من النجاح في الدراما التلفزيونية، محمد سامي يعلن اعتزاله الإخراج التلفزيوني نهائياً. وكشف عن قراره عبر حسابه على فيسبوك، مؤكداً أن موسمه الرمضاني الأخير كان مع مسلسلَي سيد الناس لـ عمرو سعد و إش إش لـ مي عمر.
وكتب محمد سامي : "وداعا الدراما التلفزيونية السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي ١٥ سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير و مع شركات و قنوات كلها مهمة، و كان دايما الجمهور بيشجعني، سواء بردود الأفعال أو بتصويته ليا في الجوائز".
وأضاف: "أي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التلفزيوني ولكن كنت بنتهي من التزامات موقعة مع شركات ونجوم والحمد لله انتهيت منها وكان آخرها 2025 ، معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل، والوحيد القادر على الدوام هو الله وحده، الحمد لله آخر عملين ليا إش إش وسيد الناس حققوا نجاح أنا سعيد بيه".
تقرير سابق: مي عمر تكشف عن ملامح شخصية إش إش
"بعتذر عن أي مشهد لم يلقَ استحسان الجمهور"
وأكمل محمد سامي حديثه كاتباً: "كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز".
وختم حديثه معتذراً فكتب: "بعتذر عن أي مشهد قدمته أثناء الرحلة ولم يلقَ استحسان الجمهور أو إعجابهم، في الآخر الفنان دايماً بيجرب والفنون جنون زي ما بيقولوا، ادعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان وأجلتها كتير لحد ما لقيت نفسي بكبر وخايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجة بيحبها عشان يعمل حاجة تانية بيحبها برضه وعايز يجربها بس محتاج عيلة تسانده على اتخاذ قراره، كل التوفيق لكل زمايلي وبحبكم وبشكركم على سنين المنافسة الجميلة اللي عملت أسمائنا كلنا وأتمنى لنفسي التوفيق في الخطوة الجديدة".
محمد سامي يتلقى الدعم من نجوم الفن
ولقي محمد سامي دعماً كبيراً من زملائه في الوسط الفني، ومن بينهم تامر حسني، الذي كتب: "أوعى تكون عايز تبعد عشان أي إحباط، جايز يكون فعلاً في بعض المشاهد اللي الناس انتقدتها وأنا شخصياً استغربتها شوية وقلت جوايا أنك مش محتاج تعملها أصلاً لأن عندك الحقيقي والأهم بس على رأيك الفنون جنون أحياناً، فكرة مجنونة تنال الإعجاب وفكرة لأ… بس ده ميخليناش ننسى إنها بعض مشاهد مش بعض أعمال، لأنك بالفعل المخرج الوحيد في تاريخ مصر اللي مفشلش ولا مرة، ويمكن الحظ محالفكش أوي في عمل ولا 2٢ على مدار 14 سنة، ودي حاجة مينفعش الجمهور ينساهالك". كما كتبت وفاء عامر: "خسارة كبيرة بجد ابني الغالي، أرجو ألا تتسرع ولكن اعتبرها فترة نقاهة لإعادة ترتيب الأوراق لتقديم عمل بمنظور آخر".
تقرير سابق: ما سر نجاح ثنائية محمد رمضان ومحمد سامي؟
