على هامش فعالية خاصة بعلامتها الجمالية في Mall of the Emirates، التقىET بالعربي نادين نجيم في دبي للحديث عن أكثر من محطة مفصلية في مسيرتها، بدءاً من تأجيل عرض مسلسلها المنتظر ممكن، وصولاً إلى التوسّع الجديد لعلامتها التجارية.
"كنت عارفة قبل بوقت".. نادين نجيم تخبرنا كيف تلقت خبر تأجيل عرض مسلسلها ممكن إلى بعد شهر رمضان
"ما تضايقت أبداً".. نادين تكشف إحساسها الأول بعد قرار التأجيل
عن اللحظة الأولى التي علمت فيها بتأجيل عرض مسلسل ممكن إلى ما بعد شهر رمضان، توضح نادين أنها كانت على علم بالقرار مسبقاً، لكنها انتظرت الإعلان الرسمي بهدوء.
نادين تقول لـ ET بالعربي: "ما كتير تضايقت صراحة، بالعكس حسّيت بإحساس جوّاتي شي إيجابي. صحيح الواحد بيكون حاطط مايند ست إنو العمل رح ينزل بوقت معيّن، وكان عندنا حماس كبير إنو الناس تشوفه، بس لما لقوا إنو أزبط يتأجّل كرمال كذا سبب، ما حسّيت إنو في شي غلط".
وتضيف أن التجربة علّمتها أن توقيت العرض ليس العامل الحاسم دائماً: "النجم يلي العالم ناطرته وبدها تحضره، رح تتابعه بأي وقت خلال السنة. في كتير أعمال كسّرت الدنيا برات رمضان، وأنا مختبرة كل شي: رمضان، برات رمضان، أوف سيزن وسيزن".
"ما في وقت محدد للنجاح"
بهذا المنطق، ترى نادين أن العمل الجيد يفرض نفسه خارج أي إطار زمني، مشبهة الدراما بالسينما والموسيقى حول العالم: "مثل أي نجوم بكل أنحاء العالم، ما في وقت معيّن إنك تنزّلي موفي أو مسلسل. الناس اللي بدها تحبك، رح تنطرك وتشوفك. وأنا اعتبرت إنو التأجيل مش شي غلط، بالعكس… الناس ناطرة وأنا ناطرة كمان".
"كل تأخيرة فيها خيرة".. فلسفة اختارتها نادين مبكراً
هذه القناعة لا تنطبق فقط على الدراما، بل تعكس مسار نادين خلال السنوات الأخيرة، حين قررت التخفيف من أعمال التمثيل والتركيز على بناء عالمها الخاص في الجمال. خطوة أثبتت نجاحها، وجعلت Nadine Njeim Beauty من أبرز البراندات العربية اليوم.
وعندما سُئلت إن كانت تعيش اليوم شخصيتين مختلفتين، تجيب بابتسامة ووضوح: "نادين نجيم الممثلة، ونادين نجيم بيوتي".
"عملته من شغف.. وكان لازم بلّش أبكر"
عن معنى هذا النجاح بالنسبة لها، تعترف نادين أن البراند لم يكن مشروعاً تجارياً فقط، بل حلماً شخصياً نابعاً من الشغف: "عملته أوت أوف باشن وأوت أوف لاف لهيدا المجال، وكرمال المرأة العربية العصرية. وكان يهمني أنجح فيه متل ما نجحت بالتمثيل وأكثر".
وتكشف أن التوسّع في دبي عبر Ulta يشكل محطة مفصلية في مسيرتها: "وجودي اليوم بمحلات، وفتح محلات بدبي لأول مرة، والإكسبنشن اللي جايي أكتر وأكتر إكسكلوزفلي مع Ulta… هيدا شي كبير بالنسبة إلي، وأنا really proud of it".
أما عن العودة بالزمن، فلا تتردد بالاعتراف: "يا ريت بلّشت قبل. الفكرة كانت ببالي من 2016، بس التمثيل، والأولاد، وكل اللي مرقت فيه أخّرني. فاينالي قلت خلص، ما بقى بدي أتأخر وعملتها".
التمثيل والبيوتي.. علاقة تكامل لا تنافس
وعن تأثير هذا النجاح على مسيرتها كممثلة، تحسم نادين الجدل: "أثّر بشكل كتير إيجابي. نادين الممثلة أثّرت على البراند، والبراند أثّر على نادين الممثلة. نحن بنكمل بعض، لأن الفاوندر تبع Nadine Njeim Beauty هي أنا، طالعة من قلبي. هيدا الشي ما بيوقف بطريقي ولا بالعكس".
