أعلن ياسر العظمة عن عودته بعد غياب ولكن هذه المرة من خلال برنامج أونلاين بعنوان "مع ياسر العظمة"، سيعرض كل يوم إثنين عبر قناته الرسمية على اليوتيوب وحساباته على مواقع التواصل الإجتماعي.
وقال ياسر العظمة من خلال فيديو نشره عبر صفحته الرسمية على الفايسبوك، "اللي بيشتاق للتاني بيسأل عليه بيجي لعنده بيزوره بيطمن عن أحواله، هيك بتحتم علينا العلاقات الإجتماعية وهيك الأصول بتقتضي، لأ وخاصةً إنو في بيني وبينكم رابطة محترمة وإعجابنا ببعض متبادل، يعني إنتو معجبين فيني وبفني وأنا كمان معجب فيكم، لأنو بدايةً ونهاية أنتو أهلي وناسي وعائلتي الكبيرة، وأنا بلاكم ما إلي قيمة متل الشجرة اللي بلا جذور".
وأضاف ياسر العظمة "أنا معجب بمديحكم وآرائكم ورسائلكم وتعليقاتكم الجميلة اللي بتفرح القلب وبتخلي الفنان يتحمس ليقدم شي جديد ولائق، وبصراحة أنا عم بستفيد بإستمرار من الكومنتات اللي عم تكتبوها، أنا مشتاق الكم بعد غياب طويل وإذا قال الشاعر من العلم ما قتل، أنا بقول ومن الشوق ما قتل".
وتابع ياسر العظمة متطرقاً للموسم الرمضاني والأعمال الدرامية، "أحبائي إن شئنا أم أبينا صار شهر رمضان الموسم الرسمي للأعمال الدرامية بحجة تسلية الصايم، وبعيداً عن الزحام الرمضاني وعن أهواء شركات الإنتاج، قررت قدم عبر صفحاتي الرسمية عبر مواقع التواصل الإجتماعي برنامج خفيف يذاع منه حلقة كل أسبوع، وهالبرمانج رح يكون بداية صغيرة وتلويح باليد كتحية للمشاهدين وإعلام عن قدومي وشوقي للقائكم".
وختم ياسر العظمة الفيديو الذي كتب عليه "حطو القهوة عالنار"، بالقول "رح تكون إطلالاتي بالبداية عبارة عن ظهور فردي بحكي فيه كل مرة عن موضوع مختلف وبتمنى إني نال إعجابكم ودعمكم، أنا بصراحة لو عملت إنتاج وسجلته وصورته وخليتوه عندي عالرف أو بالدرج وما نشرته عالملأ وما حصلت عالتفاعل المطلوب، ساعتها بعتزل وبنضب ببيتي وكفاها الله".
