وسط أجواء مليئة بالضحك والعفوية، خطفت ياسمين عبد العزيز الأنظار خلال العرض الخاص لفيلم "خلي بالك من نفسك" في دبي، حيث التقتها ريم ميلاد من ET بالعربي برفقة أحمد السقا، في لقاء كشف الكثير عن كواليس الفيلم، وسبب اتجاهها إلى الأكشن لأول مرة، إلى جانب رؤيتها لتغيّر ذوق الجمهور وتطور صناعة السينما.
من الكوميديا إلى الأكشن.. ياسمين عبد العزيز تكشف لـ ET بالعربي سر التغيير لأول مرة في فيلم "خلي بالك من نفسك"
خفة دم ياسمين والسقا تسيطر على أجواء العرض
وكعادتها، حضرت روح الدعابة مع ياسمين عبد العزيز منذ اللحظة الأولى، لتبدأ اللقاء بمزحة قائلة: "أنا مبسوطة جدًا، يعني أنا كنت لسه بقول هيروح هناك يعلي صوتهم بقى... إيه ده؟ هو هي المشكلة شكلها في السقا."
بدوره، لم يفوّت أحمد السقا الفرصة لممازحتها، فقال: "أنا لسه قاعد بشكر فيكي والله والله والله... بتقول لي ياسمين زي ما هي في المسرح. قلت لها والله ما اختلفت، زي ما هي، بسم الله ما شاء الله، يعني بتنزل وتسيب دماغها في درج في البيت."
ويبدو أن هذه الكيمياء بينهما لم تأتِ من فراغ، فالصداقة التي تجمعهما منذ سنوات انعكست بشكل واضح على أجواء العمل.
عن العمل مع أحمد السقا: الحياة أسهل لأننا أصحاب
وعن تجربتها الأولى معه في بطولة سينمائية، سألتها ريم ميلاد إن كانت شعرت بنضج مختلف في الأداء بينهما، لترد ياسمين: "لا، هو بصي، أحلى حاجة إن إنتِ عارفة السقا من زمان وإحنا أصحاب، فلما تيجي تشتغلوا مع بعض الحياة بتبقى سهلة. مش لسه بنحاول نولف على بعض، لا، إحنا عارفين بعض من زمان، فالحياة أسهل. وطبعًا أنا أول مرة أشتغل مع السقا في السينما، اشتغلت معاه إعلان قبل كده، واشتغلت معاه المسرحية، لكن أول مرة بقى نعمل سينما."
لماذا اختارت الأكشن لأول مرة؟
الجمهور اعتاد مشاهدة ياسمين عبد العزيز في الأعمال الكوميدية، لكن في "خلي بالك من نفسك" تخوض تجربة الأكشن لأول مرة، وعن سبب هذا التغيير قالت: "ما ده التغيير بقى، عشان الناس ما تزهقش. نعمل دراما، نعمل كوميدي مرة، نعمل رومانسي مرة، نعمل أكشن. والممثل لازم يعمل كل حاجة، صح ولا غلط؟ يعني لازم يعمل كوميدي، ولازم يعمل أكشن، ويعمل دراما ويعمل رومانسي."
سر إتقانها لمشاهد الأكشن
ورغم أن التجربة جديدة عليها، أكدت ياسمين أنها لم تحتج إلى وقت طويل للتدريب على مشاهد الأكشن، وقالت: "أنا مش عايزة أقول والله، الناس مش هتصدق. أنا بحفظ الحركات في ساعتها، وبعملها على طول."
وعندما علّقت ريم ميلاد قائلة: "واتقنتيها، برافو"، أجابت ياسمين: "آه والله بجد." وأضافت: "يعني أنا حتى لما باجي أعمل استعراض أو أعمل حاجة في إعلان فيها رقص ولا حاجة، أنا بعملها في ساعتها، بحفظها في ساعتها."
"الاستسهال آخره ما فيش حد بيكمل"
وخلال اللقاء، وجّهت ريم ميلاد حديثها إلى ياسمين، مشيرة إلى أن جيلها استطاع المنافسة والاستمرار رغم صعوبة المشوار، وسألتها عن رسالتها في زمن أصبح فيه البعض يستسهل النجاح.
وجاء رد ياسمين واضحًا وحاسمًا: "خلي بالك، الاستسهال ده آخرته ما فيش حد بيكمل. خلي بالك، الجمهور دلوقتي ذكي، وبعدين ما بيدخلش إلا لما يسمع الفيلم حلو ولا وحش ويدخل. هتستسهلي هتلاقي وقتك قصر، صح. لكن هتنقي، وهتشتغل، وهتتعب، وتفكر إن إنت تجيب مواضيع جديدة."
وتابعت مؤكدة أن الجمهور نفسه تغير، وبالتالي أصبح على الفنان أن يواكب هذا التطور: "دلوقتي الناس كلها في الوقت اللي إحنا فيه، في حاجات أنا كنت بعملها زمان ما ينفعش أعملها دلوقتي. حتى الكوميدي اللي أنا بعمله دلوقتي، كوميدي بتاع دلوقتي، مش الكوميدي اللي أنا كنت بعمله زمان. فاهمة قصدي؟ كنت زمان بستخدم أكتر جسمي ورياكشناتي. آه، بعمل هنا رياكشن وكل حاجة، بس الكوميدي دلوقتي أنا عاملاه بطريقة مختلفة، وبيضحك برضه. دلوقتي الجيل اللي إحنا فيه والناس الضحك بتاعهم اتغير، فما ينفعش أعمل اللي كنت بعمله زمان."
