نعت سميرة سعيد، المايسترو الراحل خالد فؤاد، في إتصال هاتفي مع ET بالعربي، حيث قالت "كنت على إتصال معاه من حين إلى آخر، هو حبيبي في الفترة الأخيرة تعب شوية، من كم يوم كنت بكلمه وكان صوتو كويس وكان بيقولي كل الوقت ادعيلي عندي كورونا، وطبعاً كان عندي أمل ولو انو عارفة إن عندو مرض تاني".
وأضافت سميرة، "أنا حزينة جداً عليه لأن ده عشرة عمري، ورفيق درب من وانا عمري 19 سنة، إلى جانب إن هو صديق بجد، وهو موزع موسيقي ومايسترو دقيق جداً، ومخلص لعمله لدرجة رائعة، واشتغل مع معظم الفنانين في الدول العربية، الله يرحمه ده فقدان كبير بالنسبة لي، وبعزي من خلالكم عيلته وعمر ومراته".
وعن الصور التي حصل عليها ET بالعربي، والتي تجمع سميرة بالراحل خالد فؤاد وأصالة، قالت "الصور دي من أقل من سنة تقريباً، إتفقت أنا وأصالة نروح نزوره علشان كان عنده مرض آخر، والحقيقة هي دي آخر مرة بشوفو بطريقة مباشرة وبعدين بقت كلها من خلال التلفونات، قعدنا معاه وهزرنا وضحكنا وكانت معاه مراته وأولاده وإفتكرنا ذكريات كتيرة أوي مع بعضنا"، وبالنسبة لسبب الوفاة، قالت سميرة "كان بيغسل كلى وجاله جلطة في القلب".
