حلّت إيمان الحصري ضيفة على برنامج "صاحبة السعادة" الذي تقدمه إسعاد يونس في أول ظهور إعلامي لها بعد رحلة علاج دامت ثمانية أشهر تخللها 7 عمليات جراحية في 21 يوماً.
وبدأت حديثها في كيف تغيرت حياتها، وقالت "فجأة الحياة اتشقلبت، حياتي كانت طبيعية وصحتي كانت كويسة بس شوية مشكلة مفروض كنت بعملها عملية، ودخلت على أني حعمل عملية بسيطة وحطلع يوم يومين بالكتير.. بقيت 8 شهور".
وتابعت: "المشكلة مش في العملية، المشكلة في الخطأ الطبي اللي حصل في العملية، والمشكلة مش في الخطأ الطبي علشان الخطأ والمضاعفات في العمليات يمكن يكون وارد، المشكلة في الطريقة الي تم التعامل فيها مع الكارثة اللي حصلت أو المهزلة، لأن الدكاترة اللي تابعوا الحالة بعديها قالولي كانت مهزلة. كان ممكن لو كان تم اتخاذ إجراءات صح حتى مع هذا الخطأ الكبير، كان ممكن ما قعدتش الفترة دي في المستشفى، كان ممكن ما حصليش المضاعفات الكتيرة اللي حصلت بعد كده.. عملت سبع عمليات في 21 يوم، سبع مرات بنزل أوضة العمليات وباخد بنج كلي، وكل مرة الوضع بسوء أكتر فيتعملي عملية على أساس الوضع يتصلح.. كل الأخطاء هي اللي أدت ان أقعد الـ8 شهور دول".
ولفتت إلى أن الخطأ الطبي حصل في الأمعاء والقولون، وأوضحت: "كان في أخطاء بيترتب عليها أخطاء.. التعامل مع الخطأ كان خطأ، ما ترتب عليه مجموعة من العمليات زي ما تكوني تنقذي حد، بدل ما بتنقذيه أخدتي إجراءات غلط فأنت بتدهوري في الحالة أكتر.. في فترة أنا ما كنتش حاسة بحاجة خالص، كنت ما بين السماء والأرض، لغاية في مرحلة من المراحل اتنقلت من المستشفى اللي كنت فيها، بعدين قعدت في المستشفى 3 شهور منهم تقريباً شهر في العناية المركزة، أنا قعدت في العناية المركزة كتير"، وأوضحت "حصل تسمم في الدم بسبب المشاكل الكتيرة والأخطاء الكتيرة اللي حصلت في بداية المعدة، اللي أنا عرفته بعد كده ان لو كان الأسلوب أو التصرف الطبي صح ما كنش حصل ده".
وتستذكر في إحدى المراحل التي خرج فيها الطبيب من العمليات، وقال لأخواتها "أنا خلصت كل حاجة معاها، فادعولها.. دي كلمة قاسية جداً".
وأشارت إلى أن أفراد عائلتها كانوا يقضون وقتهم وهي في العناية المركزة في سياراتهم، وكان أكثر ما يخيفها هو أن تترك أخوتها وترحل، واعتبرت أن ذلك كان عبئاً عليها.
وأضافت "كنت سمعت وشفت بعنيهم كلهم ان صعب أكمل، فعلاً الحالة على الورق كانت بايظة، كل حاجة مش موجودة كل المؤشرات الحيوية لبقاء الانسان على قيد الحياة.. دخلت العناية تقريباً قعدت 20 يوم ونقلوني علشان حالتي النفسية، العيشة في غرفة بتسمعي فيها صوت الأجهزة وريحة المستشفى نفسها، وأنا كنت بقالي قبليها شهر في المستشفى التانية.. فخرجت من الأوضة، كان بخلوني عايشة على الأجهزة وما فيش أي عملية.. كان عندي وقت كتير أن أقعد مع نفسي، احنا عايشين في نعم، كنت بحس الكلام ده قبل كده إنشائي ولكن ده بجد".
وتابعت ايمان: "حصلت على رعاية صحية كويسة قبل ما سافر ألمانيا، سافرت بقدر أقف على رجلي".
وروت تفاصيل رحلتها العلاجية إلى ألمانيا. ولفتت إلى أن الكلام حول تقاريرها من ألمانيا لم تكن مطمئنة جداً. ولفتت إلى انها في اليوم الثاني أو الثالث من وصولها إلى ألمانيا بدأت بالفحوصات الطبية. ووجهت تحية للدكتور هشام عاشور الذي عالجها في ألمانيا.. وبعد التفاصيل الكثيرة التي تحدثت عنها إيمان قامت إسعاد يونس باحتضان الحصري تعبيراً عن سعادتها بعودة إيمان بالسلامة.
عن مشاركتها في حفل طريق الكباش، قالت إيمان: "كلموني وقت حدث طريق الكباش وقالولي هتبقي معانا في حدث كبير، وبقدر ما كنت فرحانة ومبسوطة، كنت قلقانة وخايفة.. كنت خايفة من ردود الفعل لأني لقيت الناس كلها فرحانة لي".
وأضافت "يومها حسيت ان ربنا بيقولي في حاجة كويسة حصلت أحسن من حاجات كتير حصلت قبلها.. اتبسطت اني اشتركت في الحفلة واتبسطت أكتر بردود فعل الناس وانبساطها بعودتي، وانا بسعى ان الناس تكون راضية على اللي بقدمه".
