"الحمدالله ما اتخنتش واتجوزت 3 شهور فقط" هذا ما قالته حورية فرغلي عن تجربة زواجها السابقة، مضيفة خلال لقائها مع برنامج "حبر سري" عبر قناة "القاهرة والناس" كنت مخطوبة قبلها من حب عمري ومات قبل فرحي بيوم ولما جيت مصر ماما كانت عايزة تطلعني من اللي أنا فيه فدخلتني مسابقة Miss Egypt".
تابعت " كانت والدتي بتاخدني النادي كل يوم وهو شافني في النادي واتعرف على مامي واتقدم لي وحصل جواز ومكنش فيه حب واحنا أصحاب قوي على فكرة لحد دلوقتي وأشوفه بأي حتة ونسلم عل بعضنا وبيحلف بالبامية بتاعتي وهو اتجوز وخلف ومبسوط وأنا مبسوطة اني شفته مبسوط".
أضافت " كنت أحسن فارسة في الوطن العربي ومكنتش شايفة نفسي في الموضوع ده ولو أنا حبيت حاجة وهعملها لازم أبقى رقم واحد يا إما معملهاش خالص".
حورية فرغلي "أنا مش من النوع اللي بشد وينفخ"
ولفتت حورية إلى أنه "في سن معين برضه عايزة تحبي وتنحبي والحب زي الهوى وانتي تعرفي البنت بتحب ولا لأ من عنيها لما عنيها تبقى بتبرق ومبتسمة وبيبان عليها إنها في علاقة وأنا للأسف بعيدة عن الحاجات دي بقالي حتى كتير".
وعن مهنتها التمثيل قالت "بعمله أنا ومستمتعة وهيجي وقت والجمال هيروح والروح هي التي ستبقى وأنا لست من النوع الذي ينوي أن يقوم يشد وينفخ وأحب عندما أبطل تمثيل أن يكون لديّ عائلة".
وكشفت أنها كانت قريبة من اعتزال التمثيل "كنت قريبة أن أعتزل ومش ذنبي أنني فارسة ومش ذنبي أني وقعت وحصل لي ما حصل والناس تقول أني عملت عمليات تجميل وكنت أتلقى تعليقات قاسية ولو أنتوا متضايقين من شكلي فأنا هعتزل".
وعن علاقتها بالراحل هيثم أحمد زكي قالت "كنت بحبه وكان بالنسبة لي زميل عزيز وأكثر شوية بس هو ارتبط بيا أنا أكثر عاطفيا، بس ماكنش ينفع لأني أكبر منه بـ6 سنين وأنا مقدرش، وآخر مرة اتكلمت معاه وبعدها مكلمتوش تاني قالي باي باي يا طنط".
