بعد الانتقادات التي وجهها طارق الشناوي من خلال ET بالعربي، لدورها في مسلسل "سيد الناس"، الذي يعرض في رمضان الحالي، عبرت إلهام شاهين في حديث مع ET بالعربي عن استيائها من هذه التعليقات بالإضافة إلى دفاعها عن محمد سامي.
وقالت إلهام لنا: "أكيد محمد سامي بيدي سكة لكل ممثل في طريقة الأداء، بس مش بيفرض عليه يعملها إزاي. الشخصية اللي بعملها دي شخصية غلّوية قلبها أسود وحاقدة جدًا، حاسة بنقص شديد جواها فبتغطي عليه بهجومية دائمًا. بتتكلم بصوت عالي، بتتكلم في أي موضوع، بتتخانق، الناس محستش بالحب، ففاقد الشيء لا يعطيه، وهي مبتعرفش تدي حب، مبتديش غير كره، مش بس مع ابن جوزها كمان، بتحس ده مع أولادها".
وأضافت :"هي اتجوزت في سن صغير يعني مدرستش ولا اتعلمت واتجوزت راجل عمره ما حبها كان بيعرف ستات عليها وقالها: 'أنا أتجوزت وخلفت عيل وهتربي غصب عني'، ومش بيقولها بلطف لا، فطول الوقت بتتعامل إنها جارية يعني مش حاسة بقيمتها، يعني في مشهد بقوله: 'عمرك ما هتحب ولادي عشان عمرك ما حبتني'، فقالي: 'إنتي لماحة يعني إنتي فاهمة'، وأنا مشوفتش غيره، يعني أنا عمري ما شوفت حب، وهي حاسة إنها مكسورة لأن الراجل ده كاسرها، فبتتعامل مع الناس بقوة عشان تقولهم: 'لا أنا ست قوية' كنوع من الدفاع عن نفسها، وأنا شايفها شرسة عايزة تهجم لأنها في حالة غل، لذلك أنا شفت أداءها يكون كده، وأنا شوفت ناس كتير في الحقيقة معندناش تحضر في طريقة كلامها".
وتابعت إلهام شاهين:"الحقيقة بتظلموا محمد سامي، وهو شخص لطيف جدًا مع الممثلين، وهو حتى في اللوكيشن بيعمل أجواء كلها هزار، زي ما كل بيقول إنه بيفرض رأيه، هو بيتعصب عادي زي أي مخرج خايف على شغله، لكن في ناحية الملاحظات أنا بشوف إنه هو بيبقى صح. وبعدين اعتماد ست شلق وملهاش كبير وبتغلط في أي حد دي طبيعة الشخصية، مش شخصية شيك في كلامها".
