أثار إعلان فيلم "السلم والثعبان: لعب عيال" جدلاً واسعاً منذ طرح التيزر الأول له، بسبب ما اعتبره البعض جرأة في المشاهد وطريقة الطرح، إلا أن عمرو يوسف كان له رأي آخر تماماً، إذ قال لـET بالعربي:
"التيزر اللي مدته 20 أو 30 ثانية الهدف منه هو الـ teasing يعني إني أزغزغ المشاهد، أقول له بص في عندنا حاجة كده، ما بقولوش إيه اللي جوه الفيلم، فما تقدريش تحكمي على الفيلم من التيزر أبداً ولا حتى من الإعلان."
وعن رأي زوجته كندة علوش في الإعلان، أوضح عمرو:
"عاجبها جداً، دي كندة مبسوطة جداً من الفيلم، عايز أقولك إنها قارية الفيلم، وأنا أي عمل بعمله لازم أخليها تقراه لأنها دايماً بتدعمني، وهي حابة الفيلم ومستنيـاه جداً جداً."
الفيلم الذي يُعد عودة جديدة لقصة الحب الشهيرة بعد مرور 24 سنة على الجزء الأول، يأتي هذه المرة برؤية مختلفة تماماً، كما أكد عمرو يوسف:
"أنا من جمهور السلم والثعبان الجزء الأول، زي مصر كلها، لكن النسخة دي بتاعة 2025 مختلفة تماماً — من الشخصيات للتكنولوجيا اللي بنستخدمها، وحتى من ناحية الإخراج، لأن طارق العريان النهارده غير طارق العريان من 24 سنة. مفيش مقارنة خالص بين الفيلمين."
ويؤدي عمرو يوسف في الفيلم شخصية "أحمد الألفي"، مهندس ديكور ناجح يعيش أزمة منتصف العمر، في قصة جديدة تماماً عن الجزء السابق.
وعن اختياره لأدواره في السنوات الأخيرة، قال:
"أنا مش بحاول أقدّم شخصيات مختلفة، أنا فعلاً قدمت كده — شقو غير ولاد رزق غير درويش غير السلم والثعبان، والتنوع ده مهم جداً للممثل من وجهة نظري، علشان ما أتحطش في قالب واحد."
يُذكر أن فيلم "السلم والثعبان: لعب عيال" من إخراج طارق العريان، ومن المنتظر طرحه في دور السينما خلال شهر نوفمبر المقبل.
