بعد النجاح الكبير الذي حققته أغنية "يا مصر بتعمليها إزاي" وتحولها إلى واحدة من أكثر الأغاني تداولًا في احتفالات الجمهور المصري، كشف محمود العسيلي عن كواليس تقديمها، ورد فعله على الانتشار الواسع الذي حققته خلال الفترة الأخيرة.
وخلال لقائه مع ET بالعربي، قال العسيلي: "والله أنا مش عارف هي بتعملها ازاي وإحنا بنقول والله حيرتيني.. الحمد لله فضل كبير ونعمة من عند ربنا سبحانه وتعالى، كل التيم اللي اشتغل على الأغنية دي اشتغل بقلب، قولنا ليه منعملش أغنية مصرية وطنية تشتغل في أي حتة حتى أماكن السهر، زي ما بتشتغل هنا، الأطفال ينفع يغنوها في حفلات المدرسة.. الأغنية تبقى كل الناس بتغنيها".
وأضاف: "مش مصدق نفسي على النجاح ده الحمد لله، مفيش حد مش بيغنيها، والجملة بقت موجودة في كل حتة، حتى المعلق بتاع الكورة لما بنجيب الجون بيقول يا مصر بتعمليها ازاي، وكابتن حسام واللعيبة وهما بيتمرنوا".
كما تحدث عن تأثره بالأغنية بعد فوز منتخب مصر، قائلًا: "بدمع واتأثرت جدًا بعد الماتش لما كسبنا، كل ما أشوف الناس بتحتفل والأغنية شغالة، ودي حاجة حلوة إن الإنسان يحس إنه بيعمل حاجة مهمة".
واختتم حديثه قائلًا: "الشعب المصري في الكوميكس مبيهزرش، خدواها بالسلب وبالإيجاب، ودي أجمل حاجة في الشعب المصري إحنا مختلفين عن أي حد، في المصايب بنضحك وبنهزر، ولما بنفشل بنسف على نفسنا وبنضحك، ولما بننجح بنعظم من نفسنا بالطريقة اللي إحنا نستاهلها".
يُذكر أن أغنية "هنا مصر" جاءت بكلمات منة عدلي القيعي خالد عصام، وألحان محمود العسيلي، وتوزيع أحمد طارق يحيى ، وحققت منذ طرحها ضمن إحدى الحملات الإعلانية في شهر رمضان الماضي نجاحًا جماهيريًا كبيرًا، مع تفاعل واسع من الجمهور وتحولها إلى واحدة من أبرز الأغاني التي تصدرت مواقع التواصل الاجتماعي.
