احتفلت عائلة محمود ياسين بتكريم الفنانة شهيرة ضمن فعاليات الدورة الـ19 من المهرجان القومي للمسرح المصري، وسط حالة من السعادة بين أفراد الأسرة، الذين أكدوا أن التكريم جاء مستحقًا تقديرًا لمسيرتها الفنية، خاصة على خشبة المسرح.
شهيرة: أعشق المسرح.. وهذا التكريم انتظرته طويلًا
وقالت شهيرة لـ ET بالعربي إنها سعيدة بهذا التكريم، مؤكدة أن المسرح يمثل لها قيمة خاصة، وأضافت: "طبعًا سعيدة جدًا بالتكريم ده، لأن أنا أصلًا بعشق المسرح، وأنا خريجة المعهد العالي للفنون المسرحية، وقبل ما أعتزل قدمت 12 عملًا ما بين مسارح الدولة والقطاع الخاص، وعملت أعمال مهمة، فكنت سعيدة جدًا إن بعد الوقت الطويل ده أخيرًا اكتشفوا إن أنا بعمل مسرح... والحمد لله إن جه يوم أتكرم فيه مسرحيًا، لأن أنا بعشق خشبة المسرح".
وبعد سنوات من الابتعاد عن المسرح، جاء هذا التكريم تقديرًا لمسيرتها المسرحية التي ضمت 12 عملًا، بين مسارح الدولة والقطاع الخاص.
أحمد ماهر يستعيد ذكرياته مع شهيرة
وتحدث الفنان أحمد ماهر عن ذكرياته مع شهيرة، وقال لـ ET بالعربي: "ألف مبروك، لأن في ناس كتير ما تعرفش إن النجمة والأستاذة شهيرة كنت أنا دفعتها، فالنهارده بنلتقي في تكريم، وشريط الذكريات بيرجع مرة تانية عشان نستعيد ذكريات الرحلة الفنية والعملية قبل ما نوصل للحظة التكريم البديعة دي".
وردّت شهيرة عليه مازحة: "إحنا أكاديميين يا ابني... أكاديميين مش أي كلام".
عائلة محمود ياسين: التكريم مستحق
وقال عمرو محمود ياسين لـ ET بالعربي: "أسعدني جدًا خبر تكريمها، تكريم مستحق، وهي كانت عنصرًا أساسيًا في نجاح أي فرد من أفراد عيلتي، أي حد في عيلتي حقق شيء من النجاح كانت هي ليها دور كبير جدًا في ده، وجت على حساب شغلها، فهي تستحق هذا التكريم".
أما محمود ياسين جونيور فقال لـ ET بالعربي: "ألف مبروك، وبشكرها على مسيرتها الفنية الكبيرة، وبشكرها على كل حاجة بتعملها لينا".
شهيرة تحسم الجدل حول تكريمها
وعن ما أثير حول اختيار شهيرة ضمن المكرمين وربط البعض الأمر بالفنان محمد رياض، رد محمود ياسين جونيور لـ ET بالعربي: "اللي عايز يقول حاجة يقولها، أنا مش هقعد أعلق على الناس اللي بتتكلم على السوشيال ميديا، كل واحد ليه حرية رأيه، شهيرة اشتغلت كتير جدًا على المسرح، ولو كده كانت اتكرمت من أول دورة، ولكن حق الناس التانية كان الأول".
كما حسمت شهيرة بنفسها الجدل، مؤكدة أن اختيارها جاء من اللجنة العليا للمهرجان بعد مراجعة تاريخها المسرحي، وقالت لـ ET بالعربي: "مش محمد رياض اللي رشحني، رشحتني اللجنة العليا، وبحثت ونقبت في التاريخ المسرحي، وعرضوا على رئيس المهرجان قالوا له الست دي عاملة كذا وكذا وكذا... إيه رأيك؟ قال لهم ماشي، وافق وقال اسألوها بس، والحمد لله".
أحفادها وابنتها يحتفلون بالتكريم
من جهته، عبّر آدم محمد رياض لـ ET بالعربي عن سعادته الكبيرة بتكريم جدته، وقال: "المهرجان خاص بالنسبة لي أوي عشان جدتي بتتكرم فيه، وأنا مستني اللحظة دي طول عمري عشان أحضرها، فده بالنسبة لي كبير، وده تكريم جدتي تستحقه، فأنا فرحان أوي بيها".
أما رانيا محمود ياسين فقالت لـ ET بالعربي: "ماما شوفتلها تكريمات كتير في حياتي من وأنا صغيرة، وفي دول عربية وفي كل حتة، فالتكريم ده مهم دلوقتي، وسعيدة بتكريمها في المسرح بالتحديد، لأن أجيال كتيرة متعرفش شهيرة قدمت إيه في المسرح".
وأضافت: "التكريم ده مهم ومستحق، وكتير من الفنانين مش كل الناس عارفة دورهم المسرحي إيه، فيه أجيال مش عارفة النجوم دول قدموا قد إيه للمسرح".
