كشف أبطال فيلم محمود التاني تفاصيل العمل والشخصيات التي بيقدمونها، مؤكدين أن الفيلم مختلف عن الحريفة، ويجمع بين الكوميديا والأكشن والخطط، مع شخصيات جديدة عليهم وكيميا مختلفة بين الأبطال.
كارولين عزمي تكشف كواليس محمود التاني
وقالت كارولين عزمي لـ ET بالعربي إن شخصية نوال مختلفة عنها تمامًا، لكنها حبتها جدًا، موضحة: "نوال بنت جدعة أوي ومش متوقعة في أي موقف ودمها خفيف، والشخصية شوية تحسيها شعبي وشوية تحسيها عادي، وأنا بحب الشعبي أصلًا وبلاقي نفسي فيه، وده مختلف عني تمامًا، بس أنا هعمل حاجات مختلفة الفترة الجاية".
وعن الكواليس، قالت كارولين: "من أحلى كواليس حياتي فيلم محمود التاني، الشاشة بتبين الكواليس، وإنتوا هتشوفوا الكيمياء بينا عاملة إزاي، فيه كوميدي وخطط وميكس وأكشن".
أحمد غزي: حطينا قلبنا وروحنا في الفيلم
أما أحمد غزي، فقال: "أنا حاسس إن إحنا بنقدم حاجة مختلفة عن اللي إحنا قدمناه قبل كده في الحريفة، حاسس إن إحنا كلنا حطينا قلبنا وروحنا في الفيلم ده، إحنا عاملين فيلم فيه كل العناصر وحاولنا على قد ما نقدر نعمل فيلم حقيقي الناس تبقى فرحانة بيه وتطلع مبسوطة، وإحنا بنحب نهزر مع الناس ونتفاعل مع الجمهور".
كزبرة: الفيلم شبه كل الشباب
وقال كزبرة عن الفيلم: "الفيلم شبه كل الشباب، وفيه ضحك وكوميديا وقصة بتاعة الزمن اللي إحنا فيه، يارب يعجب الناس، وإحنا طول عمرنا مع بعض من وقت فيلم الحريفة، وأنا بحس طول الوقت إن إحنا بنحب نعيش مع الناس بجد، واللي بيتابعونا عارفين إن إحنا كده بنحب نكون معاهم".
وأضاف عن دعم شيكابالا: "شيكابالا برده دعمنا عشان اسمه محمود عبدالرازق".
تامر هجرس عن مشاركته في الفيلم
وتحدث تامر هجرس عن مشاركته في الفيلم قائلًا: "قالولي إيه رأيك تعمل فيلم مع الشباب؟ قلت لهم إيه يعني ما الفرق بينا مش كتير، بعد كده بصيت لقيت الفرق كبير، مش باين عليا إني كبرت، الرياضة وراحة البال".
وأشاد هجرس بأحمد غزي وكزبرة قائلًا: "غزي وكزبرة جمال وولاد حلال جدًا، هما جمال ويستحقوا كل خير، وأنا اديتهم شوية كهربا، بعمل أكشن في الفيلم شوية".
جنى الأشقر تكشف تفاصيل شخصيتها
وقالت جنى الأشقر عن شخصيتها: "الشخصية عملية وهتعجب الناس، وبتستكشف حاجات جديدة في الحياة، كان فيه توتر في الكواليس وكلنا كان قلبنا على البروجيكت".
المخرج عبدالعزيز النجار عن تجربة محمود التاني
ومن جانبه، قال المخرج عبدالعزيز النجار: "الفيلم فيه تيمة معينة الناس عارفاها بس بشكل جديد ومختلف، والفيلم بيتكلم عن الاختلافات بين الناس، وأحمد غزي وكزبرة طاقتهم رهيبة وعندهم طاقة من وقت الحريفة، الاتنين متقنين ومركزين في الشغل هايلين بصراحة".
إياد صالح: كنت أتمنى غزي وكزبرة يعملوا الفيلم
وقال المؤلف إياد صالح: "من بعد الحريفة وإحنا بندور على حاجات نشتغلها مع بعض، وكان نفسي هما الاتنين تحديدًا يعملوا الفيلم ده، لإني حاسسهم فيهم شبه من بعض، والجديد اللي هيقدموه شخصيتين مختلفتين مقدموهاش قبل كده، ودي تجربة مختلفة، فكل شخصية عندها مرحلتين".
طارق الجنايني: غزي وكزبرة بقوا نجمين كبار
أما المنتج طارق الجنايني، فقال: "غزي وكزبرة الاتنين دلوقتي بقوا نجمين كبار، كنا هنعمل لكل واحد حاجة لوحده، بس حبينا نعملهم الفيلم مع بعض، كزبرة ممثل تقيل وفي اختلاف في الشخصية، والاتنين إخواتي وبحبهم جدًا، وكارولين اكتشفت إن دمها خفيف أوي في الفيلم".
أحداث فيلم محمود التاني
تدور أحداث فيلم محمود التاني حول شخصيتين مختلفتين تمامًا تحملان الاسم نفسه محمود، قبل أن تجمعهما الصدفة في موقف واحد، لتبدأ بينهما سلسلة من المواقف والمفارقات الكوميدية غير المتوقعة.
أبطال فيلم محمود التاني
ويشارك في بطولة محمود التاني كل من أحمد بحر كزبرة وأحمد غزي، إلى جانب كارولين عزمي، چنا الأشقر، وتامر هجرس.
