حلت لوسي ضيفة برنامج "العرافة" في حلقته السادسة، والمذاع عبر قناتي النهار والمحور، وكشفت الكثير من الجوانب سواء على المستوى المهني أو الشخصي.
قالت لوسي، إنها تحترم مهنة الرقص والتمثيل كثيراً، خاصة وأنها بدأت الرقص منذ أن كانت في عمر الـ11 عاماً، في الأفراح الشعبية، مؤكدة "مندمتش على الفن والرقص.. مش بعمل حاجة غلط.. ولو قعدت أسمع كلام الناس مش هشتغل".
وأكدت لوسي، خلال حوارها مع بسمة وهبة، في برنامج "العرافة" أنها لا تخاف من أن تموت مرتدية بدلة رقصة، موضحةً: "بعمل حاجة الدنيا كلها شايفاها، مش تحت أو فوق السرير، بعمل حاجة في العلانية، زي ما الدكتور بيلبس البالطو بتاعه، والكناس بيلبس لبسه، إحنا بنشتغل مهنة في النور".
وتابعت: "أنا لا أقدم بجاحة.. الفن والرقص مُعترف بيهم.. والرقص مرسوم على جدران قدمائنا المصريين، نصيبي كده ومكتوب على جبيني إني هبقى رقاصة وأشتغل في الأفراح الشعبية لحد ما أكبر شوية وأبقى كومبارس وممثلة ونجمة وبطلة ومشهورة".
وأضافت لوسي، "لو عملت حاجة غلط هقول لربنا اغفر لي وسامحني.. لكن أنا معملتش حاجة غلط.. أنا عملت حاجة العالم كله بيحبها ويقدرها".
لوسي تكشف أسباب رقصها الأفراح الشعبية
وكشفت أسباب رقصها في الأفراح الشعبية منذ صغرها، حيث قالت: "كنت مسؤولة عن أسرتي.. وسعيدة إني عملت كده ومش حاسة إني مظلومة.. هي ظروفي كانت كده، وأنا سمعتي حلوة والناس بتحبني وبحب الناس وبحب الشغل والرقص والتمثيل والفن والحاجات الحلوة".
