مازالت أغنية محمد منير الجديدة "للي" تلاقي تفاعلًا واشادات من الجمهور منذ طرحها يوم الأربعاء الماضي. ويتعاون منير في هذا العمل على صعيد الكلمات مع أكرم حسني، الذي تفاجىء بعد صدور الأغنية بإتهامات تشير إلى أنه قام بسرقة الكلمات من شاعر من جنوب مصر.
ورد أكرم حسني على هذه الإتهامات من خلال بوست كتبه على الفيسبوك قال فيه "قريت من شوية بوست بيتهمني بسرقة كلمات اغنية " للي " من شاعر من جنوب مصر الحبيب و بعدها اكتر من صحفي كلمني بيطلب مني رد على الاتهام ده .. ف خلوني اوضح كذا نقطة".
- كل الحب و الاحترام و التقدير لكل موهبة فنية بتقدم فن يحترم الجمهور و جنوب مصر خرجلنا شعراء و ادباء كتير علي رأسهم الخال الابنودي رحمة الله عليه
- أؤمن بحقوق الملكيه الفكريه كما أؤمن بان السرقه الفنيه تصنع نجاح مؤقت
- تشابه جملة من الأغنيه التي تتكون من ١٢ بيت مع جملة للشاعر لا يعني السرقة و انما توارد الافكار امر طبيعي
- لما كتبت الاغنية كانت مكونة من ٢٠ بيت اختار منهم الكينج ١٢ بيت و تم تسجيلهم ف معتقدتش اللي كتب ٢٠ بيت هتقف معاه في جملة عشان يسرقها
- انا بكتب اغاني بقالي اكتر من ٨ سنين من خلال برامج و مسلسلات و اعمال فنية قدمتها و كنت علي سبيل المثال في اغاني برنامج ابو حفيظة قبل ما بستخدم لحن اي اغنية في البرنامج برجع لجمعية المؤلفين و الملحنين و اسدد الرسوم حفظا لاصحاب حقوق الملكية الفكرية .. ف اللي يعمل كده بيتهيألي صعب يحط نفسه في موقف زي ده
- انا مهنتي الاساسية ممثل و بحب صناعة الاغاني من باب الهواية ف انا مش محتاج اسرق عشان اعمل رصيد لنفسي كشاعر .. انا بعمل ده بحب
- و اخيرا .. انا كتبت البوست ده مش دفاعا عن نفسي و لكن لاحترامي للجمهور المحترم اللي بيثق فيا ف حبيت اوضح له.
