تحدثت إليسا في الحلقة السادسة من "بودكاست إليسا"، عبر تطبيق أنغامي عن موضوع التنمر، حيث إعتبرته إليسا "موضوع كتير خطير، وقررت إطرح موضوع التنمر لأني شخصياً تعرضت لكتير من التنمر وخصوصاً بعد ما خلقت مواقع التواصل الإجتماعي".
إليسا قالت، خلال الحلقة "واجهت هجوم وتنمر كبير، بس لإني كنت بزور طبيب نفسي هالشي ساعدني إن واجه هالتنمر ويوم بعد يوم يصير عندي مناعة ضده الكلام الجارح والقاسي اللي تعرضتله، يعني أنا تعرضت لتنمر على شخصي وشكلي وآرائي الجريئة يللي أنا بطرحها"، وتابعت "لليوم بعد في ناس بيسموني إم الشرشف، في ناس عطيوني هاللقب وبعدن بيتنمر عليي، بس هون بحب أكد هالشي ما أثر عليي أبداً".
وأضافت إليسا، "الإنتقاد البناء شي والإنتقاد الجارح شي تاني، آثار التنمر خطيرة كتير، الشخص اللي بيتنمر بيعاني من مرض نفسي، يعني أنا حدا ممكن يتمسخر على تمي، يا حبيبي أنا بنت تعبت على حالي ووصلت ليه أنت ما بتشتغل على حالك لتحقق ذاتك وتنجح، وعلاج التنمر بيتطلب حل جذري بيبلش من البيت".
وختمت إليسا، "لكل ضحية تنمر بدي وجه كلمة من قلبي لإني أنا كنت ضحية تنمر بيوم من الإيام، وبعرف هالموضوع قديه مئذي، ما في شي بيوقف هالممارسات إلا إذا واجهنا وحبينا حالنا، وخلينا نلتجئ للناس اللي بتحبنا وبتسمعنا، وبالاخر بدي خبركن سر أنا وصغيرة كان بيي موظف ووضعنا على قدنا والمحيط اللي حوالينا كان وضعن أحسن وكانو يحسسوا هالشي لـ بيي، وبيي على قد ما كان مثقف وطيب ما كان ينزعج بس أنا كنت إتضايق، ومن خلال هالبودكاست بقول أنا إليسار بنت زكريا خوري ووصلت لهون لإني بنتو".
