جدل كبير أثارته تصريحات سيف الدين سبيعي، عن أن سلافة معمار كانت مرشحة لمسلسل "على صفيح ساخن"، قبل أمل بوشوشة ولكن الإتفاق لم يتم، فتم ترشيح أمل بوشوشة بعدها، ET بالعربي تواصل مع المخرج والمنتج إياد الخزوز، صاحب شركة I See Media إحدى الشركات المنتجة للمسلسل، للوقوف عند حقيقة الموضوع.
وقال إياد الخزوز، خلال حديثه مع ET بالعربي "بدايةً إسمحولي أتوجه بالشكر لفريق العمل في مسلسل (على صفيح ساخن)، على التميز اللي كانو فيه في هذا المسلسل وعلى المتعة اللي خلوقها واللي كانت ميزة حقيقةً في أعمال رمضان لأن المسلسل رجعنا للمسلسلات الحقيقية الحلوة الطبيعية الواقعية اللي فيها تلقائية عالية وفيها أداء مميز في التمثيل والإخراج والنص اللي مكتوب بتفاصيل حلوة والشخصيات المكتوبة بتشبه الناس اللي على الارض".
وتحدث إياد الخزوز عن بطلة العمل أمل بوشوشة، حيث قال لـ ET بالعربي "بالنسبة لموضوع النجمة أمل بوشوشة، حقيقة من السنة الماضية كانت معنا بمسلسل (النحات)، وبتعرفوا كمان إنو المسلسل ما إكتمل وبالتالي ما قدرنا نستمتع بأداء أمل ووجودها بمسلسل (النحات)، لان ما كمل وكان الجزء الأكبر من دورها بعد الحلقة 15 فإتفقنا من السنة الماضية إنو تكون أمل معانا برمضان 2021، وبلشنا ندور على نص لغاية ما الأخت ديالا الأحمر اللي هي شريكتنا في سوريا بعتتلي العمل وأتفقنا أنو تكون أمل هي بطلة المسلسل وحقيقةً كانت الخيار الأول بالنسبة إلي وبالنسبة لشركة الإنتاج، وحكيت معها أنا شخصياً، وسألتها إذا بتحكي سوري قالتلي اه وكانت مشغولة بعمل تاني وقالتلي منحرب نلاقي وقت وبعدين حكيت مع الأخت ديالا وحكت مع الأخ سيف اللي كان مرحب ومبسوط وقلي أمل إضافة للمشروع والدور".
وختم إياد الخزوز "وفي موضوع إنو كان سيف مفكر بحدا تاني بممثلة تانية يعني، أي مخرج حقه المشروع يفكر بأكثر من خيار لما يجي يفكر وبعدين بيجي بيحكي لشركات الإنتاج، بس حقيقةً أنا ما وصلني ما حكى يعني سيف من جهته كان بيفكر بمجموعة خيارات ومنها أمل أصلاً كمان، ولكن إحنا كشركة إنتاج اللي الخيار الأول إلنا كان أمل وإنحكى مع أمل وسيف فوراً أبدى ترحيبه بالموضوع وأمل فنانة مهمة ووجودها بأي عمل هو إضافة".
