لا تزال أصداء "صالون زهرة" الإيجابية تتصدر مواقع التواصل الاجتماعي، وشكرت نادين نجيم على خاصية الستوري المشاهدين على تفاعلهم مع العمل، كما شكرت كل طاقم العمل والمنتج والمخرج.
وقالت: "بشكركم من كل قلبي على تفاعلكم مع "صالون زهرة"، أعطيتوني طاقة حلوة، طاقة إيجابية متل ما أنا أرسم بسمة على وجهكم، متل ما قلتلكم العمل رح يكون خفيف، نضيف، لطيف، مهضوم وظريف بفصل الخريف، أنتوا كمان أعطيتوني نفس الشعور".
وتابعت: "بدي قول لكل فريق العمل، وأصحابي ورفقاتي الممثلين، يعطيكم ألف عافية رح اشتقلكم كتير، زينة، أنجو، نهلة، توفيق، معتصم حبيب قلبي، طوني عيسى وكارول عبود، فادي أبي سمرا ومجدي مشموشي، كلكم يعطيكم ألف عافية، وبالتأكيد كابتن العمل المجنون والأخوت اللي دعكنا ما خلا فينا حالة، على قد ما كنا نتعب نصير نضحك متل المجانين لحالنا بالآخر، جو بو عيد (مخرج العمل)".
كما شكرت نادين جو، وقالت: "بشكرك جو لأنك استنزفتني، كل طاقاتي ما خليت فيني شي"، وكررت الجملة التي كانت ترددها بالعمل "يا ما شاء الله عليك". ولفتت إلى أنها كانت تريد أن تطلق عليه لقب "هتلر العمل"، وأضافت: "لما الواحد بدو يوثق لازم يوثق عالآخر وأنا وثقت فيك وسلمتك حالي ونفسي، ومسلسلي ومسيرتي وكل شي والحمدالله النتيجة كانت ناجحة".
وشكرت كل فريق العمل والذين يقفون خلف الكاميرا، بالإضافة إلى ستايليست العمل دينا نوفل وجوني متى.
وختمت سلسلة الفيديوهات بالشكر لمن وصفتها بأختها، لمى صبّاح وقالت: "بعرف قديه بتنتبهي على الشغل وبعرف قديه بتغاري على كل مسلسل بتكوني انت عم تشتغليه من قلبك، يعطيكي العافية ورح اشتقلك كتير هيدي السنة، وأكيد لبيي الروحي ورأس الهرم الأستاذ صادق الصبّاح. أنا كمان بحبك كتير، بتشكرك من كل قلبي، مبروك ومبسوطة كتير لنجاحنا، فعلاً الواحد بقول كتّر خير الله، رغم كل شي عم نمرق فيه ربنا بعوضك بأشياء انت ما بتكون متوقعة بتجي متل بلسم لكل شي عم تمرق فيه، مبروك نجاحنا".
وأرسلت قبلاتها للفانز الذي وصفتهم بعائلتها الموجودة على السوشيال ميديا لتفاعلهم معها ومع أعمالها الذين يشاركوها لحظات الفرح مع كل إطلالة ومسلسل. واعتبرت أن التجاهل هو الحل الأفضل للتعليقات السلبية.
كما أعلنت نادين بأنها ستبتعد قليلاً هذه الفترة ولكن ليس لوقت طويل، وقالت: "رح كون بهيدي الفترة مزبوط غايبة بس مش كتير، رح تشوفوني بإطلالات لأنه في قصص ما بقدر أطلع منها، رح كون عم بشتغل عالبزنيس تبعي، تمنوا لي الحظ وانشالله يا رب الفكرة اللي عم بشتغل عليها تعجبكم. طول عمري بحب عالم البزنيس وبحب يكون عندي البراند تبعي مش براند وحدة كذا شغلة".
وفيما يتعلق بـ"صالون زهرة" لا تزال صور العمل ولاسيما الحلقة الأخيرة التي احتفل فيها الجمهور بزواج "زهرة" من "أنس" (معتصم النهار) يتم التداول بها على مواقع التواصل الاجتماعي على الرغم من عرض الحلقة الأخيرة منذ يومين، ولكنها لا تزال تتصدر الترند على مواقع التواصل الاجتماعي.
