قبل عرض مسلسل "مدرسة الروابي 2" كشفت تيما الشوملي ملامح الجزء الثاني في لقاء خاص مع ET بالعربي.
في البداية تحدثت تيما عن ردة فعل المتابعين على الفيديو التشويقي ومفاجأتهم بتغير في كاست العلم، وقالت: "هاد هو رد الفعل اللي أنا متوقعته لأنو بالنسبة لي إذا ما كان رد الفعل هيك يعني أنو الشخصيات اللي عملناها الموسم الأول ما تعلقوا فيها الناس وما حبوها كفاية، وهذا يدل على كمية تعلق الناس بالبنات والوفاء لهم".
وأضافت الشوملي "زي ما الناس حبوا وتعلقوا بالبنات من الموسم الأول أنا متأكدة أنهم رح يتعلقوا و يحبوا البنات بالموسم الثاني".
وعن اختيارها الكاست، قالت تيما الشوملي: "بالموسم الأول كان عندي برضو بنات وجوه جديدة، ما عدا ركين سعد، بالموسم الثاني نفس الشي عنا تارا عبود عندها خبرة بالتمثيل.. بس البنات التانيين في منهم بحبوا التمثيل وبدرسوا تمثيل وفي منهم ما عمرهم فكروا بالتمثيل، وهي الكاستينغ من المراحل المفضلة لي، أنا بحب اشتغل بهي المرحلة عشان هيك باخد وقتي، وبالرغم من وجود كاست جديد في الجزء الثاني، إلا أنه روح الموسم الأول موجودة من خلال تشابه بنوعية الشخصيات".
وكشفت تيما أن البنت القوية في هذا الموسم شخصيتها جداً مختلفة عن البنت اللي كانت قوية بالموسم الأول، وقالت: "البنت القوية بالموسم الأول كانت لا تهتم بدراستها، البنت القوية بهاد الموسم هي البنت الأولى على الصف، البنت اللي بهمها بس انها توصل وشغلها، وغير البنات الجدد أيضا هناك اختلاف بالقصة، مدرسة الروابي 2 رح يركز على موضوع وسائل التواصل الاجتماعي، وتأثيره على الصحة النفسية للمراهقين".
وأضافت "هي القصة بالنسبة الي من أكثر القصص اللي كتير مهم نحكي عنها لأنو هاد العالم عالم خلص صار فينا ومنا وبحياتنا سواء شأنا أم أبينا فكيف نتعامل مع هذا العالم.. وانا بحس أنو رح يكون هذا الموسم يمكن wake up call لكتير ناس أنو نصحى ونشوف تأثير كل شي نحنا عم نعمله على الناس اللي عم يشوفونا".
وتابعت حديثها عن الجزء الثاني، "رح نحكي عن فكرة العار اللي موصولة بأشياء اللي بتصير على السوشيال ميديا فكرة يعني الأشياء المتاحة للبنات والشباب الصغار على السوشيال ميديا اللي انا بوقتي ما كان موجود.. ففي خطورات معينة، حتى الأهل كتير مهم يحضروا هاد الموسم زي ما هو مهم لهاد الجيل هو مهم كتير للأهل أكثر ليصغروا هي الفجوة بينهم وبين ولادهم ونفهم إيش يعني اللي عم يصير أون لاين".
وعن الإنتقادات التي ممكن أن تحصل، قالت تيما الشوملي: "انا كتير حبيت كيف بالموسم الأول المسلسل فتح مجال للحوار، بين الناس وهاد هي الفكرة.. يعني نحنا لما نعمل فن أحلى يجب أن يطرح جدل بطريقة إيجابية انا بالنسبة الي هذا النقاش اللي صار بين الناس اللي صاروا يتناقشوا عن هي القصة وصاروا يحكوا عن هي القصة.. وبهاد الموسم رح نطرح أسئلة جديدة كتير مهم تنسأل هي الأسئلة وكتير مهم الناس يفتحوا هذا النوع من الحوار".
