على بُعد أيام من دخولها القفص الذهبي، تعيش دانا الحلاني تفاصيلها الأخيرة قبل ليلة العمر، فيما تستعد للاحتفال بزفافها على آلان يوم 19 أغسطس في فيطرون، بعد قصة حب بدأت بالصداقة واستمرت لأكثر من أربع سنوات.
وخلال الـPre-Wedding Photoshoot الخاص بها، رافقت ET بالعربي دانا حصريًا من أول اليوم إلى آخره في منطقة الزعرور، حيث كشفت تفاصيل عن علاقتها بآلان، واختيارها موعد ومكان الزفاف، وفستانها من إيلي صعب، إلى جانب عدد من المفاجآت التي تنتظرها في الحفل.
دانا الحلاني تكشف تفاصيل ليلة العمر لـ ET بالعربي
من الصداقة إلى الزواج في 19 أغسطس
أما عن بداية قصة الحب، فتروي دانا أن علاقتها بآلان بدأت كصداقة ضمن مجموعة من الأصدقاء، قبل أن تتطور العلاقة تدريجيًا، وتقول: "أنا وآلان بلشت علاقتنا كصداقة، كنا جروب أصحاب كثير. آلان كان بيحكي مع ماي بيست فريند من أيام المدرسة، فتعرّفنا على بعض من خلالهم. وهيك بلشت كصداقة، وشوي شوي صارت تتطور العلاقة".
وعن الصفات التي جعلتها تشعر بأن آلان هو الشخص المناسب لمشاركة حياتها، تضيف: "كثير بحب بآلان إنه هو شخص كثير مسؤول، كثير بيشبهنا، يعني عيلته وعيلتنا كثير نشبه بعض. كثير حدا بيحب يقضي وقت مع عيلته، كثير حدا طموح، مثابر، بيشبهني، عنده أحلام مثلي، كثير بنكمل بعض أنا وإياه".
دانا تختار فيطرون للزفاف وتكشف سر الرقم 19
وبعد أكثر من أربع سنوات على بداية علاقتهما، يتوج دانا وآلان قصة حبهما بالزواج في 19 أغسطس، في حفل يقام في فيطرون، بعيدًا عن المزرعة الحلانية التي احتفلت فيها شقيقتها ماريتا بزفافها.
وعن سبب اختيار هذا التاريخ تحديدًا، تقول دانا: "هيدا الديت اللي تجمعت صراحة، يعني بين شغل بيّي وخيّي وأختي ونحن وشغله لآلان، يعني لقينا هيدا الديت مناسب، بس ما بعرف ليه حسيت إنه الرقم هيك عجبني، حسيت هيك تفاءلت بالخير يعني. إن شاء الله يكون نهار خير، وعن جد الله يتمم على خير إن شاء الله يا رب".
أما عن تفاصيل الزفاف، فتكتفي دانا بالحفاظ على بعض الأسرار، قبل أن تكشف عن تفاصيل إطلالتها، موضحة أن شعرها سيكون من توقيع توني المندلق، فيما تتولى المكياج جيانا مراد.
فستان من إيلي صعب ومفاجآت ليلة العمر
وبالنسبة إلى الفستان، اختارت دانا إيلي صعب، الذي تجمعه بها وبعائلتها صداقة، إلا أن الاختيار النهائي لم يكن كما تخيلته في البداية، وتوضح: "إيلي صعب المبدع، كل الديزاينز تبعه بيعقدوا، بس فيّي أقول لك إنه الفستان اللي نقيناه ما كان كثير براسي إنه هيدا اللي رح ألبسه. يعني أنا كنت متوقعة حالي رح ألبس غير شيء".
وتشير إلى أن تجربة القياس غيّرت وجهة نظرها، وتتابع: "بس وقت اللي تبلشي تقيسي وهيك، بتصيري تحسي إنه لا، بتصيري تعرفي شو بيلبق لك، والاختيار يعني بمحله، وكثير محمسة". وحول إمكانية اعتماد أكثر من فستان خلال الحفل، تترك دانا الباب مفتوحًا قائلة: «ما بعرف، بنشوف! بنشوف!».
وخلال جلسة التصوير، لم تخلُ الأجواء من موقف طريف كاد يربك دانا، بعدما وصلت إلى موقع التصوير ونزلت من السيارة، ليفتح سحاب فستانها بالكامل من الخلف. وعن الموقف، تروي: "وصلنا لهون على السيت، نزلت من السيارة، فجأة بيفتح السحاب كله من ورا، وبيعلق من فوق! يعني أنتِ تخيلي، وكلهم شباب يعني هون، وصرنا أنا وندى: يلا يا ندى وشو بدنا نعمل وهيك، والـlife saver صلحتي لي إياه".
أغنية خاصة من عاصي الحلاني ومفاجأة ماريتا
وبعيدًا عن تفاصيل الإطلالات، تحمل ليلة العمر مفاجآت خاصة لدانا، أبرزها الأغنية التي حضّرها والدها عاصي الحلاني خصيصًا لها، بعدما كانت قد سمعتها قبل نحو عامين وتمنت أن ترقص عليها يوم زفافها.
وتكشف دانا: "بتعرفي هالأغنية من سنتين سمعتها أنا، وقلت له لبّي: أنا بس بدي أتزوج بدي أرقص عليها، وبقي هو تركها، يعني أنا ما صدقت صراحة، لأنه قد ما حلوة الأغنية كلهم يقولوا له: يلا نزلها وهيك. وأنا يعني بس مرة قلت له إنه على بالي أرقص عليها وعن جد ضبها. نهار اللي قلت له إنه قررنا إنه خلص هالسنة ناويين يعني، تاني يوم راح على الاستوديو".
أما ما سيقدمه الوليد الحلاني وماريتا الحلاني خلال الحفل، فتفضّل دانا إبقاءه مفاجأة، قائلة: "إيه لا، هول بنتركهم سوربرايز".
لكن عند الحديث عن شقيقتها ماريتا، تكشف دانا جانبًا آخر من تحضيرات الزفاف، خصوصًا مع تأثر ماريتا وحماسها الكبير للمشاركة في اليوم المنتظر، وتقول: "ماريتا كثير مبسوطة وكثير متأثرة. أنا ما توقعت إنه ماريتا، بطبعها ما كثير تعبر وهيك، بس كثير حسيتها متأثرة وهيك، وبدها تضل معي، عرفتي؟ يعني كل أحد بالليل بتقول لي: شو عنا هالجمعة؟ شو عندك مواعيد؟ وبتصير تظبط السكيدجول وهيك. إيه، كثير محمسة، ورح تطلع بتسطل، ورح تعمل برفورمنس كمان، هيدي إكسكلوسيف".
كوليت الحلاني وآلان.. العائلة مطمئنة
وبينما تستعد دانا لليلة العمر، تبدو والدتها كوليت الحلاني مطمئنة إلى اختيار ابنتها، خصوصًا بعد السنوات التي جمعتها بآلان، وتوضح دانا: "مثل كل أم، ليك ماما مرتاحة صراحة. بتحب كثير آلان وخلاص إنه صار لنا فترة مع بعض، يعني أكثر من أربع سنين أنا وآلان سوا. كثير صار فرد من العيلة، وأهلي كثير مرتاحين يعني، وبيعرفوا قديه بنحب بعض وبنحترم بعض. ومثل كل أم أكيد يعني إنه كل أهل بيخافوا على أولادهم، بس إنه بس يكون الشخص صح، بحس إنه بيطمنوا شوي".
وبعيدًا عن أجواء الزفاف، يبدو أن دانا تدخل حياتها الزوجية وهي تحمل أيضًا مهارة خاصة في المطبخ، بعدما وصفت بأنها "شيف" وأكلها طيب، لكن لديها خطة للحفاظ على رشاقة العريس، إذ تقول مازحة: "بس بدنا نعمل له دايت، ما فينا بنصير أنا وإياه بنروح بالعرض".
وعن اهتمامها هي أيضًا بنظامها الغذائي، تكشف دانا أنها خسرت نحو تسعة كيلوغرامات خلال العام الماضي، قائلة: "إيه، ليكي صار لي سنة عم بنتبه كثير على أكلي، وضعفانة يعني شي 8-9 كيلو، وهالـركض عم بضعف بعد بلا ما حس يعني. هلا بعد العرس برجع بناكل وبنعوض".
