شكلت حادثة مقتل الطالبة نيرة من جامعة المنصورة صباح اليوم على يد أحد الشباب أمام باب الجامعة حالة من الغضب والصدمة للرأي العام حيث تصدرت حديث الناس والنجوم عبر السوشيال ميديا اليوم.
وانتشرت عدة أقاويل عن سبب الجريمة التي قيل أنها تعود لحب القاتل للراحلة والتي رفضته أكثر من مرة، ولم يتبين حتى الآن صحة هذه الأقاويل من عدمها ومازالت التحقيقات جارية.
عدد من الفنانين تفاعلوا مع القضية وكان أولهم أحمد جمال الذي علّق عبر الفيسبوك : "اللي خد القرار انه يقتل البنت دي طالب جامعة يعني لا يتخطى ال ٢٢ سنه بمنتهى الجرأه و السهولة خد قرار انه ينهي حياة شخص فكر و دبر و حدد الميعاد اللي هينفذ فيه جريمته الحقيقه انا مصدوم و حزين …"
"ربنا يرحمك يا بنتيو كلامي لأي شاب صغير الشهامة والرجولة يابني انك تخاف على اللي بتحبه وتحافظ عليه ولو مش عايزك في حياته خلاص شوف طريقك وابعد في هدوء من غير اذى اتعلموا الرحمة و علموها لولادكم من دلوقتي قبل بكره".
وكتبت أيتن عامر: "هو اللى جرا فى الدنيا !!!! ربنا يرحمها يا رب انا مش لاقيه حاجة اقولها"
أما ريهام حجاج فكتبت رسالة قالت فيها : "لا حول و لا قوة إلا بالله العلي العظيم اللهم أرحمك يا نيرة و يصبر أهلك و يجعلك من أهل الجنة يا حبيبتي شهيدة…شهيدة الأخلاق و الأنسانية إللي خلاص ماتوا و ادفنوا في قلوب الكثيرين… "
"إيه إللي جري للناس !!! الناس باقيت وحووووووووش لا خايفة من ربنا و لا من قانون …الكره و الحقد و الغل و الأذي باقوا سمات العصر حقيقي الواحد حزيييييييييين علي أهل بلده و علي إللي وصلناله اللهم أرحمنا برحمتك و أحمي أهالينا و أولادنا و أخرجنا منها سالمين اللهم آمين".
مايان السيد كتبت سلسلة تغريدات عن الموضوع عبر تويتر "تفتكروا حقها هيرجع بس لما يتعدم؟ و لا هيرجع فعلا لما نربي بجد عشان فعلا يبقوا رجالة محترمين؟ يعرفوا ازاي يحترموا كل بنت و كل ست و ميشوفوش انو من حقهم يغتصبوا و يقتلوا! ربوا ان العنف تجاه المرأة بكل اشكاله غلط! و انك تبقي راجل يعني تبقي انسان و يبقي قلبك علي غيرك".
سمية الخشاب كتبت في تغريدتها أيضًا "ارجوكم لو لقيتو اي ست بتتضرب او بتتعرض لعنف في اي مكان اتدخلوا يمكن تنقذوا حياتها، حرام بنت في العمر ده لسه ماشافتش دنيا تروح عشان حقير مجرم قاتل زي ده، ربوا اولادكم بقي عشان قرفنا، متخلفوش لو انتوا مبتعرفوش تربوا كفايه!! واعدام ان شاء الله".
وأيضًا من النجوم الذين تفاعلوا مع الموضوع كل من أحمد عوضي، انجي علاء، دينا فؤاد، مصطفى درويش، إيمان الحصري وغيرهم.
