على أنغام أغنية "أحلى بنوتة" لمدحت صالح وعفاف راضي، شارك شريف منير فيديو عبر حسابه على إنستغرام يصالح فيه ابنته "أسما" دون ذكر المشكلة الحاصلة بينهما: " أنا منزّل الكليب ده علشان بصالح أسما .. بنتي و حبيبتي .. لإني كنت مزعلها .. متزعليش مني يا أسما .. أنا فعلاً كنت بايخ".
وردت أسما على الفيديو بالتعليق عليه قائلة: "أنا مقدرش أزعل حضرتك، على راسى وفي قلبى، بجد فرحتني بشكل مش عادي، طريقتك فى الصلح جميلة وكبيرة عندي أوي.. بحبك وربنا ما يحرمني منك أبداً".
وبعدها شاركت أسما فيديو يظهر مشاهد لهما من برنامج "أنا وبنتي" عبر حسابها بـ"انستغرام" كان جمعها بوالدها، علقت عليه برسالة مطولة قالت فيها " هي دي تقريباً علاقتي انا و ابويا ناقر و نقير، ابويا برج الثور و انا برج الحمل الانثنين طيبين بس سخنين و متسرعين. عايزه احكيلكم علي موقف مهم جداً و اثر فيا.. ابويا عمل حاجة امبارح علمتني حاجات كتير اوي، للي ميعرفش كان في سوء تفاهم كده و كنت زعلت شويه منه".
وتابعت "فاجأه لقيته منزل ڤيديو عنده علي الانستجرام بيطيب خطري و بيقولي ماتزعليش قدام كل الناس، طبعاً انا كنت طايرة من الفرحة و نسيت اصلاً اني كنت في يوم زعلانه لانها حركة في منتهي الجمال و الحنية و الطيبة، و كمان علمتني كتير اوي و ده اللي خلاني احكي الموضوع".
"اولاً اتعلمت ان الاعتذار بيكبر الواحد جداً عمره ما يصغره، الكبرياء اللي يخلي حد فاكر انه لو معتذرش هو كده جامد ده كلام فارغ، علمني اني لما ازعل بنتي اعتذرلها لو فعلاً غلطانه عشان عرفت قد ايه بيفرق في النفسيه و مش عشان احنا اهل يبقي مش وارد اننا نغلط، ابويا جريء و صادق و اللي علي قلبه علي لسانه و انا بحترمه و بحبه و بتعلم منه كله يوم، عامل معدله صعبه و حقيقي خطيرة، مكس كده ما بين انه صاحبي و ابويا، يعني ضحك و تهريج و احكيله كل حاجة بس وقت الجد عسكري واقفة قدام حضرت الظابط..ربنا يبعد عنا العين الوحشه و يباركلي فيه و في عمره و افضل اتعلم منه كل يوم و افضل فخوره انه ابويا العمر كله".
