في أول تصريح له بعد إنفجار بيروت، كشف ملحم زين خلال حديثه مع ET بالعربي، عن تضرر منزله لقرب موقعه من الإنفجار، "اتضرر كتير لأنو بعيد 500 متر تقريباً عن المرفأ، وولادي إصابات طفيفة، أنا بخير ما كنت بالبيت ومرتي بخير".
وخلال حديثه حصرياً مع ET بالعربي، قال ملحم زين "اللي مش بخير نحنا من جوا، من برا سلمنا، بلدنا مش بخير، أمننا مش بخير، نحنا محكومين من عصابة ما بعرف شو بدنا نسميهم يعني أسوأ من هيك، من 7 سنين وعم تتوالى الحكومات وعارفين في قنبلة ذرية مزوعة ما حدا بيشيلها، في كارثة كبيرة تتخطى مرحلة الفشل ما بعرف شو بيسموها، أنا ما بعني حدا، اليوم وصلنا لمحل يضربونا بالذرة خلص، بدن هالكم غبي يلي بيقبضوا 100 دولار ليصوتولن وينتخبن".
وأضاف ملحم زين، "عم بيقولك خود ولادك وفل، بدن البلد إلن، الشعب مقسم طائفياً، ما بقى تنفع الأغاني ومواقف السوشيال ميديا، صار بدها تتعلق المشانق"، وتابع "نحنا ولا شي بدون محيطنا العربي، والموقف العربي اللي صار مع بيروت بيأكد إنو ما إلنا غير محيطنا العربي".
ملحم زين وبلهجة حادة، قال "شاطرين بس بالشحادة وطلب المساعدات، عنا طقم سياسي بدو حرق، نحنا موجوعين من جوا أكتر من برا، اذا بدنا نضل قاعدين ببيوتنا بدن يموتوا ولادنا شي من مواد غذائية أو تلوث أو سيارة مفخخة، لازم نفوت عبيوتن، او الجيش يستلم البلد".
