"نفسيتي تعبانة جدًا"... بهذا التصريح الصريح، كشفت ملك أحمد زاهر عن تعرضها لوعكة صحية مفاجئة منذ 3 أيام، وسط حالة من القلق بعد عجز الأطباء عن تحديد السبب حتى الآن، وأكدت أن حالتها النفسية تمر بمرحلة صعبة بسبب ما تعانيه.
ونشرت ملك أحمد زاهر رسالة مطوّلة عبر خاصية القصص القصيرة على حسابها الرسمي في "إنستغرام"، قالت فيها:
"عمري ما كنت بنزّل غير الحاجات اللطيفة أو المواقف المضحكة أو أي شيء إيجابي، وحتى لما كنت بنزّل حاجة سلبية، كنت باخدها بهزار وبشاركها بس مع الـClose Friends. لكن مؤخرًا لاحظت إن في تعليقات كتير كلها طاقة سلبية، من نوع: (إنتِ عايشة ومبسوطة وإحنا مش)، وكأن الناس مش قادرة تتقبل إن في حاجات بسيطة ممكن تفرّحني، زي خروجة مع صحابي أو إني أروح الجيم".
وأضافت: "حبيت أوضح إن حياتي مش كلها وردية، أنا بقالي 3 أيام تعبانة، وفجأة حصلتلي حاجة صحية لحد دلوقتي الأطباء مش عارفين سببها، وده مأثر عليا نفسيًا بشكل كبير. بقول الكلام ده علشان الناس تفهم إن ورا الصور والفيديوهات الحلوة على السوشيال ميديا، في جوانب تانية من حياتنا مش بنحب نشاركها".
وأضافت: "رغم اللي حصلي، أنا حمد لله راضية، ومؤمنة إن ده اختبار بسيط وإن شاء الله هعدي منه بسلام، بس حقيقي نفسيتي تعبانة، وكل اللي طالبة منكم إنكم ما تحكموش على حياة أي حد من مجرد صور أو فيديوهات.. لأنها مش بتظهر غير جزء صغير جدًا من الواقع".
وختمت: "الهدف من الستوري مش إن حد يقلق، الحمد لله أنا كويسة، وإن شاء الله اللي عندي له حل. أنا بس حسيت إن الوقت جه إني أشارك الوحش زي ما بشارك الحلو.. مش أكتر".
