في مهرجان وهران السينمائي، خطفت نادية الجندي الأضواء بتكريم خاص عن مسيرتها الفنية اللي امتدت لأكتر من نصف قرن، واللي وصفتها بأنها “رحلة كفاح طويلة مشيت فيها خطوة بخطوة”.
وقالت لـET بالعربي إن الجايزة دي “بتمثل تتويج لمشوارها اللي ما راحش سودا”، وإنها شايفة إن “النهارده هي بتحصد سمار التعب والتضحيات اللي قدمتها”.
النجمة المصرية كانت متأثرة جدًا خلال لحظة التكريم، خاصةً إنها حسّت إن الذكريات رجعت بيها لورا وهي واقفة على المسرح. وقالت: “أعمالي دلوقتي بتحس إنها كأنها اتعملت سنة 2025، كأنها معمولة النهارده… وبتشوفها أجيال جديدة وبتستمتع بيها”.
أما عن إطلالاتها اللي دايمًا بتثير الجدل، فظهرت نادية الجندي في مهرجان وهران بإطلالتين مختلفتين بالـsuits، واحدة بالأسود والتانية بالأخضر مع تاي ملوّنة، واللي خلتها ترند على السوشيال ميديا. وردّت على التعليقات اللي قالت إن الستايل مش مناسب لسنّها وقالت بكل صراحة:
“مفيش حاجة اسمها اللبس دا مش لايق لسنك.. دي جملة سخيفة. ممكن واحدة تبقى كبيرة في السن بس جسمها رشيق والفستان لايق عليها، خلاص يبقى لايق عليها.”
وعن سر حبها لنشر صورها باستمرار، وضّحت:
“الصور دي بتثبت إن الجمهور مشتاقلي، لما صورة تعمل ترند وتفضل بالأسبوع، دا معناه إن الناس بتحبني ومستنياني.”
وكعادتها، ما بتحتفظ نادية الجندي بجمالها ورشاقتها لنفسها، بل دايمًا بتشارك جمهورها نصايحها في الـlifestyle، وقالت إن أهم 3 أسرار هي:
ممارسة الرياضة لأنها “إكسير الحياة”،
الحفاظ على الأكل الصحي والنوم المنتظم،
وتجنّب أي شيء ممكن يضر البشرة.
أما عن نظامها الغذائي فقالت بابتسامة:
“أنا محرومة على طول، في حاجات كتير نفسي فيها ومقدرش آكلها… كل حاجة في الدنيا ليها تمن.”
