ردت هيدي كرم بشكل مباشر من خلال ET بالعربي ،على كل الإنتقادات التي واجهتها مؤخراً بسبب الفيديو الذي شاركته مع ابنها أثناء ممارستهما الرياضة عبر حسابها الرسمي في إنستقرام.
وقالت هيدي كرم لـ ET بالعربي "الموضوع أخد أكتر من حجمه كتير في حياتي وعلى السوشيال ميديا وفي الميديا عموماً، ومش عارفة ليه إيه اللي حصل، أنا بقيت ابص على الفيديو وأرجع أعيد تاني يمكن في حاجة أنا مش شايفاها بجد"، وأضافت "أنا عامةً بتجاهل ولما يبقى في كومنتات سخيفة أوي بحذف ومش برد، بس ده في صميم علاقة الأم بإبنها فإحنا لو شايفين إن العلاقة اللي فيها حنية وطبطبة وأحضان وتعبير عن الحب وإستمتاع علاقة شاذة يبقى في مشكلة عند بعض العناصر في المجتمع".
وتابعت هيدي لـ ET بالعربي "يعني أنا أفهم إن إنت تهاجمني علشان لبسي أو علشان أعمالي أو اللايف ستايل بتاعي أرائك ومعتقداتك والحاجات اللي إنت بتؤمن بيها وأحترم ده على فكرة ولو حطيت حاجة حسيت إنها ممكن تضايق الناس بشيلها على طول، إنما دي لأ عند علاقتي بإبني حأف جامد".
وعن رد فعل إبنها بعد الإنتقادات، قالت هيدي لـ ET بالعربي "متأثرش خالص قعد يقوللي إنت شهرتيني، يعني هو إنسان عاقل والحقيقة زي ما في ناس هاجمتني في ناس أكتر بكتير ساندتني على المستوى الإعلامي وعلى مستوى الرأي العام حقيقة ودي حلاوة مجتمعنا عند المشكلة الحقيقية بيوقف".
