مازال ترند "انتش واجري" يتصدر حديث الناس على التواصل الاجتماعي، وهو عبارة عن رقصة مؤداه على موسيقى أغنية شهيرة تم استبدالها بكلمات غير مفهومة، وكانت البداية بعد انتشار مقطع فيديو لشاب يدعى هيثم أحمد الشهير بـ "ويجز الغلابة"، وحاول من خلال الفيديو تقليد أغنية الراحل مايكل جاكسون "سموث كريمنال".
جذب هذا الفيديو إنتباه عدد كبير من النجوم والمشاهير في الوطن العربي، لمشاركة مقاطع فيديو، ظهروا خلالها وهم يرقصون على الأغنية، والنتيجة كانت هي إنتشار الترند مما حقق ملايين المشاهدات على تيك توك.
ترند "انتش واجري" يتسبب في إنقسام الآراء
انقسمت الآراء بالوسط الفني ما بين مؤيد ومعارض خاصة بعد انتشار أخبار حول تعاقد إحدى شركات الإتصالات الكبرى بمصر مع مغنيها لتحويل أغنية ترند "أنتش وأجري" إلى كول تون خاص بالشركة.
وفي بيان رسمي أصدرته الشركة نفت ما تم تداوله مؤخرًا عبر مواقع التواصل الاجتماعي، عن وجود تعاقد بينها وبين أحمد هيثم الشهير بـ"ويجز الغلابة" لضم إحدى فيديوهاته التي اشتهرت باسم "انتش واجري" وضمها لخدمات الكول تون، مؤكدة على عدم وجود هذا المحتوى كخدمة كول تون لعملائها.
هاجم الموزع عادل حقي، أغنية "انتش واجري" وكتب عبر فيسبوك: "اللي هايقوللي رزق وربنا لما يريد يرزق عبده والكلام الفارغ ده يمسح نفسه من عندي، كفاية إسفاف بقي، كفاية قرف، اللي طلع علينا وبوظ ذوق الناس وبقينا نسمع قرف وأصوات لا تليق انها تتسمع في المجاري، كفاية أبوس إيديكم بقي، حد يوقف المهزلة دي، رينجتون ايه اللي اتعاقدتوا معاه عليه؟ نغمة مسروقة؟؟؟؟ النيزك يارب، النيزك".
انتقد الشاعر أمير طعيمة أغنية "انتش واجري" وكتب عبر فيسبوك: " "أنتش و أجري" مرآة لواقع احنا بنحاول نجمله، انعكاس لذوق متدني و جهل و حالة لا وعي بيشارك فيها معظم الناس بقصد او بدون قصد، الموضوع بقاله ١٠ سنين كده بيبدأ بإفيه و استظراف ويقلب لحقيقة على الارض و فكرة ليها رواد و مدافعين عنها و ناس بتتحول لأصحاب حقوق".
وأضاف: "احنا في زمن - مع احترامي للجميع - الصنايعي بقى باشمهندس، واللي بيفك الخط بقى مراسل صحفي، و اي حد يطلع على التلفزيون بقى إعلامي، حتى الدكتوراة ممكن تشتريها بمبلغ زهيد من دول شرق أوروبا، أما بقى لو معندكش أي مهارة مهما كانت بساطتها ففرصة عمرك تبقى فنان".
انتقدت رنا سماحة فرقة "واما"، لمشاركتهم في ترند "انتش واجري"، ووجهت عتابها إلى أعضاء فرقة واما عبر فيسبوك قائلة: "عندي عتاب على قدر المحبة للفريق العظيم، اللي أنا واحدة من اللي اتربوا على فنهم وأغانيهم اللي تجنن (واما)، وأتمنى يتراجعوا عن الهزاراية لو اعتبرناها هزاراية اللي نزلت امبارح".
وتابعت: "للأسف الهزاراية دي فتحت وهتفتح علينا باب مستنقع كبير، وكله دلوقتي اللي قرر يوزع واللي قرر ينتج ويتعامل مع القرف ده على أنه فن، أتمنى مننساش أن الفنان قدوة وانتوا نجوم كبار وكل فرد فيكم عنده تاريخ كبير يستاهل أنه يتخاف عليه، أتمنى تقبل كلامي بصدر رحب من محبة لفنكم".
وأضافت: "قبل ما أكون فنانة صغيرة بحارب وسط كتير من محاربين العك، أنا حقيقي حزينة ومش مصدقة اللي وصلناله وأننا خلاص بقينا في عصر الترند أياً كانت قباحته، مش هتكلم عن الاعلام اللي كله ما شاء الله جري بسرعة كعادته ورا الترند التافه المسف لان مصداقيتهم وأهميتهم أصبحت باينة للجميع".
علق المؤلف أيمن بهجت قمر على منشور رنا سماحة قائلاً: "إيه المشكلة يا رنا ما فيه أغنية انتي أي كلام والسالمونيلا وكان في أبو الليف هزار على الأقل دول فرقة موسيقية وشباب بيهزر، إيه الإهانة ما هنيدي غنى اموئ وفؤاد كماننا، وطول عمر الدنيا كدا إفيهات وبتتحول لأغاني".
شارك محمد الكيلاني في تعليقه كاتبًا "انا متضايق جدا من الاغنيه الاصليه علي فكره بس صدقيني مش عارف ابطل اغنيها دي اول حاجه تاني حاجه ال اي كلام ده لما واما غنوه ب هرموني شكله كده في غناهم و مزيكتهم الناس فهمت ان حتي الاي كلام ممكن بيقي له شكل شييك مفيش مشكله انك تقول اي كلام بس الفنان حتي لما يقول اي كلام حيقولوا بالشكل ده او في شكل صح حتي لل اي كلام و في الاخر هي موجوده بشكل sarcastic يعني اكيد محدش شاف الفيديو تخبل انهم بيعملوا Coverمعرفش دي وجهه نظري بصراحه".
دافع محمد جمعة عن صاحب ترند "انتش واجري" وكتب عبر فيسبوك: " طول عمري في هذا المجال بشوف حجات كتيره قوي بتحصل وناس بتاخد موقف مع او ضد وبرغم ان ده تريند هايتنهي اسرع من ما بدأ الا اني شايف زاويه تانيه ف الموضوع اسمها ربنا (ولأرزقن من لا حيلة له حتي يتعجب صاحب الحيله) الله اعلم حصل معاه كل ده ليه ؟ حد يعرف هو ليه عند ربنا ايه ؟".
ودافع عمرو محمود ياسين عن فرقة واما وترند "انتش واجري" وكتب عبر فيسبوك: " ايه المشكلة لما يطلع حد زي بتاع انتش واجري ويعمل حاجه غريبة وتبان انها Fun وتاخد يومينها و باي باي؟ ايه المشكلة؟ طالما علقت مع الناس.. ليه لازم ناخد الحكايه ونعملها ايدين ورجلين ونقعد نقول يا خساره الفن وعملنا للي مش عارف ايه سعر وكل الكلام ده؟ ياما تريندات طلعت والناس اتكلمت عليها شوية وهزرت و راحت لحال سبيلها عادي".
شارك فريق واما، في ترند "انتش وأجري" وفي مقطع فيديو ظهر فيه جميع أعضاء الفرقة وهم يقومون بغناء الأغنية بتوزيع جديد، بعد مشاركتها شن المتابعون على مواقع التواصل الاجتماعي هجومًا كبيرًا على فريق واما.
كما ظهرت سوسن بدر في مقطع فيديو عبر انستغرام وهي تؤدي أغنية "انتش واجري"، مع مساعد المخرج شكري حليم من كواليس أحد أعمالها القادمة، وأطلت في الفيديو بجلابية سوداء وغطاء رأس أسود.
ونشرت هند صبري، عبر إنستغرام مقطع فيديو تظهر فيه بصحبة إياد نصار وهدى المفتي وهم يرقصون على ترند "إنتش وإجري" من كواليس مسلسلهم الجديد "وش الريح" من إخراج أحمد خالد موسى، وعلقت هند صبري على الفيديو قائلة: "انتش واجري، مجانين في التصوير".
