حلّت الممثلة المعتزلة داليا إبراهيم ضيفةً على برنامج "كلام الناس" الذي تقدمه ياسمين عز على قناة Mbc مصر،وذلك بعد غياب لنحو عشر سنوات، حيث عادت داليا إبراهيم إلى الوسط الفني مجدداً معربةً عن استعدادها لخوض المجال مجدداً.
عن سبب اعتزالها، قالت "أنا بعدت عن الوسط الفني، انما من سنة ونص قلت ان أنا حاعتزل الوسط الفني وقلتها على استحياء ما قلتش ان أنا حاعتزل واديت مبررات، فقلت أن أبعد من باب البعد برضه.. أنا كنت قاعدة في البيت والبعد والاختفاء ما كنش مني ممكن من صنّاع الأعمال".
"اشتغلت في السياحة"
وتابعت "أنا اشتغلت حاجات تانية، اشتغلت في السياحة شوية وعملت دورات في حاجات، عملت في مجال المحاماة، ومؤخراً كتبت ثلاث سيناريوهات ورواية ان شاء الله تتنشر".
عن اسم الرواية قالت "الرواية اسمها غريب شوية، اسمها "انهم يبيعون الحشيش".. دي قصة عن راجية دي البطلة وبتواجه صعوبات في حياتها كتير وبتلاقي انه الموضوع بسيط هي اللي مش واخدة بالها من تفاصيل الحياة".
ووصفت الكتابة بعالم بحد ذاته، ولفتت إلى أنها عرضت السيناريوهات الثلاث على أحد الأشخاص واحتمال ممكن يكون في استجابة"، وأوضحت بأن السيناريوهات هي نصوص أفلام لا مسلسلات، ولكن الموضوع سيحتاج لمزيد من الوقت بسبب توقف الأعمال السينمائية في الوقت الحالي، على حد قولها.
"لن أضع الباروكة"
وقالت في اللقاء التلفزيوني على شاشة MBC مصر "أنا مش محجبة بالشكل المتزمت، انما بلبس ايشارب وبكم وطويل.. ده مش حيحجم الأدوار علشان احنا عندما ثلاث ارباع متحجب والتاني لاء، يعني ما فيش مشكلة ان الواحد يكون لابس على راسه ايشارب وهو بمثل".
وتابعت "المحجبات عندنا مهضور حقهم، يعني ما فيش مشكلة انهم يعيدوا نظر في الحكاية دي.. ما فيش عائق للفنان، العائق مش في اللبس، ده اللي بقوله عليه الأدوات الخارجية للفنان، وفي أدوات داخلية الواحد بعبّر بيها عن الشخصية".
عن وضع الشعر المستعار في التمثيل، قالت "مش ححط باروكة.. ما فيش حاجة اسمها تستحرمي يعني احنا مش حندخل في قضية الحلال والحرام، دي نابعة مني أنا، وطبعاً فيها جانب ديني ولو بسيط انما مش عنى كده ان في حد حيعد الشعرات اللي أنا مطلعاهم، المهم ان في حالة ما بتسببش أي ازعاج".
عن دورها في "كلمني شكراً"، قالت "قريت السيناريو، بعدين رجعت لخالد يوسف قلتله ليه حعمل المشهد مع عمرو عبد الجليل.. فقالي ازاي ده انت فنانة وكده، وفكرت شوية مع نفسي وقلت أوكي حعمله يعني.. لما عملته ساعتها عمل قلق يعني عمل دوشة بالنسبة لي وقالولي ليه يا داليا تعمليه احنا واخدين عليكي حنينة ورومانسية.. بس مقارنة باللي بيحصل دلوقتي ما كنش في حاجة الدور خالص".
"مستعدة للزواج برجل يصغرني بـ10 سنوات"
عن حياتها الخاصة، تطرقت داليا إبراهيم للحديث عن ابنتها فريدة البالغة من العمر 21 عاماً، ورداً على سؤال قالت "فريدة في رابعة كلية.. احنا صحاب ومنقعد نتخانق عادي.. أحياناً بكون أم شديدة بس في المجمل طبعاً مش شديدة، قلبي رهيف جداً عليها".
وتابعت "في الجيل ده في ناس حلوة وفي ناس واعية وفي ناس كبرت قبل الأوان، فهي من الناس اللي فاهمة شوية ما بحتجش ان أنا أمشي وراها وأقولها عملي كذا وما تعمليش كذا.. وهي اللي ساعات بتنصحني".
وأوضحت "عايزاني أرجع للوسط الفني بس"، وأشارت إلى أن تاريخ ميلادها الموجود على محرك البحث غوغل والذي يشير إلى أنها وًلدت في العام 1974 غير صحيح، بل هي أصغر.
عن ان كانت ابنتها تملك صوتاً جميلاً، قالت "فريدة صوتها حلو فعلاً.. ممكن تكون مطربة، أديها فرصتها انها تعيش حياتها الأول وبعدين لو حبيت أوكي ما فيش مشكلة.. تكمل في التمثيل أو غنى ما عنديش مانع، هي بعد الكلية حتتشكل قدامها الأمور لو قررت أنا ما عنديش مانع لو ما قررتوش تبقى ريحت دماغها من أمور كتير".
لفتت إلى أنها ليست ضد الزواجات التي تحقق فيها المرأة دخلاً أعلى من دخل زوجها، وأن تساعده في الانفاق على المنزل.
واعتبرت أنه أمر عادي أن تتزوج رجل أصغر منها، وقالت "فرق السن ما بيعملش مشكلة إلا لو كان هو مش واعي وكبير كفاية وراجل يعني، انما بشوف ناس أصغر مني انما دماغهم حلوة وأحسن كمان". واعترفت بأنها مستعدة أن تتزوج رجل يصغرها بعشر سنوات.
