بعدما تصدر مسلسل "فاتن أمل حربي" اهتمام المشاهدين والمجلس القومي للمرأة في مصر ودفع دار الإفتاء المصرية للتوضيح حول قضايا تتعلق بالمرأة المطلقة والحضانة، ها هو العمل مرة جديدة يثير الجدل وهذه المرة يتعرض لانتقادات من رابطة الآباء المتضررين من قانون الأحوال الشخصية.
ففي رد على تعليق شاركته نيللي كريم على حسابها على تويتر، جاء فيه "ما فيش ست وحشة.. في ست مطحونة من الحياة والهم"، علق المتحدث بإسم رابطة الآباء المتضررين من قانون الأحوال الشخصية أحمد عز، في حديث لـ"مصراوي"، قائلاً "ربنا خلق كل إنسان، وكل إنسان ليه حسناته وعيوبه، وفي ستات النهاردة بتتمسك متهمة بالسرقة، وفي ستات بتعذب ولادها عادي، ومالهاش حجة".
وتابع "فكرة أن الست مُعنفة ومظلومة من القانون طول الوقت، وأنها بتسأل شيخ أزهري إن ربنا مقالش إن الحضانة تسقط عن الأطفال بزواجها، لإن ربنا رحيم بالستات، غير مقبولة، لأن ربنا برضه رحيم بالأب والأطفال، وأكيد أدرى بعباده".
وأضاف "في بيوت كتير جداً بتتخرب بسبب الست مش بسبب الراجل، لأن الست قررت أنها عايزة تطلق، فالفكرة نفسها مغلوطة، فكرة أن مفيش ست وحشة، فكرة في حد ذاتها مغلوطة.. في ستات كتير وحشة، في ستات كتير بتعمل قضايا ملفقة للرجالة.. فكرة إننا نطلع ناس في مسلسل مش عارفة ترد أو سُذج، لازم نفصل كتاب ربنا عن سنة النبي عشان الأفكار الجديدة ده كله مرفوض".
وتابع: "طول ما الإعلام ماشي في اتجاه واحد، يبقى إحنا غلط.. نيللي كريم بتستخدم السوشيال ميديا عشان تعلي مشاهدات المسلسل بتاعها، هي وزملاءها بغض النظر عن ما يتركه هذا العمل في المجتمع من فساد".
