تصريحات جديدة لحسن شاكوش في لايف شاركه اليوم على صفحته على الفيسبوك والتي لم يتحدث فيه عن أزمة منعه من الغناء وإلغاء تصاريح الغناء الخاصة به، بل علق على جملة "لو رب البيت طبال فبنته هتطلع رقاصة" والتي أغضبت العازفين واعترض عليها بالنيابة عنهم سعيد الأرتست في النقابة مساء أمس.
حسن شاكوش تأسف لكل العازفين والطبالين في اللايف وأوضح وجهة نظره والتي لا يقصد بها الإساءة : "أنا طالع دلوقت لايف علشان خاطر كل أخوتاي وفرقتي بتوع المزيكا واللايف ده يخصهم هما وانا مكانش قصدي اطلع اغلط في أى عازف وطبال وانا شخصيا معايا عازفين وبعيد عن أنهم عازفين فأنا بحترمهم ومقدرش أغلط فيهم وأي مطرب مالوش أى قيمة من غير الفرقة ".
وأضاف شاكوش في حديثه: "أسألوا كل الفرق سواء فرقتي أو أي فرق تانية وأسألوا أنا بتعامل إزاى مع الناس ولو قالوا أنا تنك يبقى ليكم الكلام وفي فيديوهات على اليوتيوب في كل حتة في مصر .. وعامل اللايف علشان أوضح وجهة النظر ولما غلطت كانت أول غلطة ليا من ساعة ما دخلت المجال ولكن غصب عني علشان اتشمت بأمي والموضوع خلص ورضا وفرقته إخواتي وعمري ما زعلت حد منهم وأنا عمري ما أغلط في أى عازف وأسألوا أى عازف وعمري ما أتنكت على حد ولو أى عازف أو بتاع مزيكا عازف زعلان متزعلوش".
وأوضح حسن شاكوش وجهة نظره قائلا: "بتكلم على أن الاب سايب البيت ومش مسيطر فيه البنت او الشاب بيبقوا واخدين راحتهم فمفيش حاكم وانا لما قولت لو رب البيت بيطبل فأنا ماليش علاقة بالطبال وانا بطلع اغني بفلاشة وبغني بفرقة على حسب المتعهد فانا مش هقعد في البت فبغني بفلاشة انا مش هقعد في البيت وانا لو هشيل طوب وزلط من الأرض هعمل كده علشان اجيب القرش بالحلال ".
