على الرغم من أن شيرين عبد الوهاب اعتذرت ببيان رسمي صادر عن مكتب محاميها عن ما قالته بحق الراحل حسن أبو السعود وقبول عائلته لهذا الاعتذار،إلى أن التعليق على الموضوع لم يتوقف.
والجديد كان دخول الشاعر بهاء الدين محمد على الخط حيث كتب على فيسبوك "#حسن_أبوالسعود 💚حبيبى اللي عمرى ما حسيت إنه مش ف الدنيا واللي كل الوسط بيحبه وكان وجوده ف أى مكان بيعمل حاله من البهجة بروحه الطيبة وقلبه اللى كله حب وفن" .
وأضاف بهاء:"الفنان اللى عملنا مع بعض نجاحات عايشه لحد النهاردة ومنها #أسف حبيبتى #لما النسيم #فى ناس #أصعب حب #وعدا الليل #عمال يحكيلى_عنها، ومئات الأغانى اللى كان بخبرته ف اللايف بيعرف يجيب الجملة اللى الناس تحبها وبالفعل سيطرنا سنين على الساحة الغنائية وغيرنا كتير . ده غير أنه كان من أفضل العازفين على الأوكرديون ف العالم" .
وتابع بهاء حديثه عن الراحل حسن أبو السعود "و ف يوم من الأيام وهو نايم تعبان لقيته إبتسملى وسألنى أنت عارف مين أكتر حد ح يزعل عليا لما أموت ؟ قولتله إسم من أسماء ولاده . قالى لأ أنت أكتر حد ح يزعل عليا وبالفعل أنا مابقيتش حتى أمشى من شارع بيته وفضلت فترة طويلة أنسا أنه مات لأنه عشرة فن وحياة . وكان بيحبنى كأنى إبنه وكان بيفرحلى بكل نجاح حتى لو مش معاه وح أبقى أحكيلكم إزاى إتقابلنا لأن الموضوع ده مهم".
وعن حديثه عن شيرين عبد الوهاب فقال: "المهم علشان أقول اللى ضميرى بيحسه ف موضوع #شيرين_عبدالوهاب واللي جهات كتير عايزنى أقول رأى ف كلامها عنه او وصفها أنا بكل صراحه بأقول ماحستش إنها قاصده تهينه ولا تسخر منه هي بس إستدعت سيرته بشكل يبدو ساخر لكن أنا رغم إنى متضايق منها وهو عندى من أغلى الناس إلا إن إحساسى قالى إنها ماتقصدش" .
لأن فعلا لما كنا بنتقابل كان بيحتفل بشيرين وبيحب فنها و البساطه اللي فيها وهى كانت بتحبه وتحترمه" .
وختم رسالته قائلا: "وللعلم أنا لما كنت بأروحله وشبعان ومش طايق أشوف أكل اول ما يقولى تاكل بأداء ماشوفتش زيه بألاقى نفسى بأجوع 😀 الله يرحمه كان فنان ودمه خفيف وقلبه قلب طفل بس هى غلطانه إنها بتطلع تتكلم !!! ولو ليا سلطة عليها مش ح أخليها تنطق لا على مسرح ولا لقاء ولا حتى ف حياتها الشخصية".
