بعد الجدل الكبير وتعليقات الجمهور على حلقة حسام حبيب في برنامج "رامز إيلون مصر" ، رد حسام حبيب عبر ETبالعربي، قائلا:"رامز أكيد بيهزر لأنه عارف أن الكلام اللي بيقوله ده مش حقيقي طبعًا، رامز إنسان محترم، ولو في حاجة حقيقية مش هيهزر فيها، هو هزاره تقيل شوية، عايز أقول للناس اللي بتهاجم، أنا لو زعلان، زعلان عليكم مش منكم، لأن الموضوع بسيط".
وأضاف:"ربنا قال: يَا أَيُّهَا الَّذِينَ آمَنُوا إِنْ جَاءَكُمْ فَاسِقٌ بِنبَأٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ."لما يتقال عن حد حاجة، اسمعه واحتفظ برأيك، أيًا كان إيه رأيك بس متحكمش ومتهاجمش، أنت كده ارتكبت ذنب لأنك مش عارف هو صح ولا غلط، وفي الحالتين أنت غلط.أنت كمشاهد، الموضوع مش موضوعك أصلاً".
وتابع حسام حبيب:"أنا عاذرهم من الكلام اللي بيسمعوه. أنا والله خايف عليهم، خايف على اللي قال واتكلم، لأنه نسى إن في ربنا مطلع وعارف، والحكم ليه هو، أنا حسابي مع ربنا لو أنا غلطان، حسابي معاه هو، ولو مش غلطان هيبقى موقف صعب أوي لأي حد هاجم وحكم من غير ما يعرف الحقيقة، لكن لو وقف عند رأيه من غير ما يهاجم ويحكم ويشتم، فهو كده مرتكبش ذنب، ده رأيه هو حر، هسيب ربنا يحكم، لو مش في الدنيا هيحكم في الآخرة".
ووجه حسام حبيب رسالة لجمهوره، قائلا:"وشكرًا وكتر ألف خير للناس اللي بتدافع، بس اعملوا زيي أنا عمري ما دافعت، وعمري ما اتكلمت، وعمري ما هنزل لمستوى الخناقات والمعركة دي، المعركة أصلاً مش معركتي، أنا واثق من أفعالي، واثق من أخلاقي، واثق من تربيتي، واثق من خوفي من ربنا، أنا قلت للناس قبل كده، أنا وضعت سيرتي عند ربنا، فمش قلقان خالص، ربنا قال: "وَعِزَّتِي وَجَلاَلِي لَأَنْصُرَنَّكَ وَلَوْ بَعْدَ حِينٍ" أنا واثق في وعد ربنا وعارف قدرته، وخايف على الناس عشان أنا واحد منهم. وده اللي اتعلمته، واتربيت عليه إني محطش طرف تالت بيني وبين ربنا.ربنا عدل، رحمن رحيم، غفور رحيم قادر".
وأختتم حسام حبيب كلامه:"بتمنى للناس حياة سعيدة وسلام وصحة.ربنا قادر يعوضني، ربنا يجبر بخاطري بعد التجربة دي، يعوضني حياة جديدة وذُرية صالحة ونجاح مش بس في الشغل، في حياتي عامة، وأنني أرضي أهلي، مكنتش أعرف هيقول إيه في المقدمة، وده كله هزار، اللي هيزعل من هزار يبقى بيصغر مخه، مفيش حاجة تزعلني، أنا عارف إن الكلام ده كله مش صح، وعمرى ما هزني، هو رامز هزاره تقيل وناس كتير بتزعل منه، بس طالما هزار، أنا معنديش مشكلة خالص، ضحك الناس، وربنا يقدرني وأرد له المقلب ده في يوم من الأيام".
