بعد تداول مقطع لاليسا من حفل "ليلة أمل" الذي حصل في بيروت وجمعها بهبة طوجي وأسامة الرحباني، وبعد تغيير في كلام احدى أغنيات فيروز "حنا السكران" حينما قالت اليسا "عم يزبط بنت الجيران" وفي الأغنية الأصلية تقول كلماتها " يغني وتحزن بنت الجيران" و بعد تداول هذا المقطع على السوشال ميديا .
علقت ريما الرحباني ابنة فيروز من خلال حسابها على فيسبوك فهاجمت أسامة الرحباني وكتبت " الحق مش ع إليسا! واليسا باللي صار ضحيّة مش مجرمة، المجرم الأوّل والأخير هوّي الطبل اللي داير إليسا والتوابع ومعتقد حالو بيحقلّو يتصرّف ويأذن للفنانين يغنوا أغاني فيروز ".
اليسا باللي صار ضحيّة مش مجرمة
تابعت في منشورها على فيسبوك الذي أرادته أن يكون مختصراً كون الأمر لا يستحق "معتقد بيحقلّو يشوّه ويبهدل هالإرث براحتو بيدون حسيب ولا رقيب! وهالشي كلو فقط لأن عبقري متل زياد أعاد بعض الأغاني! فإعتقد الطبل إنو هو كمان عبقري ووريث وو بدّو يعيد ووو نفس الأغاني".
أضافت "كما وإني كنت أكيدة انو إستقواء اليسا بالمرّات السابقة كان مدعوم بأذونات الطبل اللي قاعد ع المسرح! بس قد ما ذكي فضح حالو وقطع الشك باليقين! بس معليش.. إلا ما يصير في دولة وحبوسة فهيدا الموضوع ما رح فوت فيه هلق".
وأشارت ريما إلى أن المهم بالموضوع إنّو شغلة اللي بدّو يعيد شي ويسمّي حالو بروديوسر ويمضي ع الطالع والنازل وفوق كل الأسامي ويعربش ع الأصل والأصليين، شغلتو مينيموم يعلّم الفنان أصول اللفظ واللحن والأداء والكلاااااااااااام مش شغلة المغنّي يغنّي ع ليلاه! وينبش كلام من ذاكرتو وقت كان عمرو عشر سنين".
اللي بده يعمل تحية لعمه يحترم ألحانه
وكونه في هذه الليلة أراد أسامة تقديم تحية للراحل الياس الرحباني بغناء اليسا وهبة بالحفل قالت "اللي بدّه يعمل تحيّة ولو كذّابيّة لعمّو أقلّه يحترمله ألحانه ويحترم ورثته خاصة اذا كان عارف ومأكّد إنّو الورثة ما بيريدوا هالأغاني بالذات تنعاد ورثة الياس، واذا بتمرق ع بعض الناس إنّو هاي فعلا تحيّة ما بتمرق ع كل الناس إنّها كذابيّة".
تابعت "عدا عن إنّو ما بفهم كيف ممكن واحد يعمل حفلة كلا نشاز! بهالوقاحة، شو ما شاطر يتفلسف إلا ع الهواة؟ ومصدّق حاله ونازل فيهن بهدلة إنّو هوي يابا شي كتير مهم وعبقري، وديكتاتور ومُتطلّب وقاسي ومش سهل الرضى أبداً... كيف بيوقف الشخص كيف بيحرك إيدو كيف بتحرك الراس وين بيلتفت أيمتى بيلتفت، كل شاردة وواردة بدّو يكون راضي عنّا... وما بيعجبو العجب! والله العظيم تحط نفسك في مواقف بايخة، فهاي ما كانت تحيّة هاي كانت إهانة لأعمال عاصي ومنصور والياس وبس بزيادة هلّق".
وختمت ريما منشورها "في عاصي الرحباني واحد ما في غيرو ولبعد ألف سنة ما بيجي غيرو عرفت كيف؟".
تغريدة اليسا
من جهتها، اليسا ردت على كلام ريما بطريقة غير مباشرة ودون تسميتها من خلال تغريدة على تويتر " موتوا بغيظكم!! والشاطر يفهم !!!".
وكتب وديع أبي رعد على تويتر " ما تقولولي ما كانت ليلة امل ؟ نجاح منقطع النظير… وعيت العجيبة… تحية لاليسا واسامة الرحباني وهبة طوجي".
وانقسم الجمهور بين مؤيد ومعارض لكلام ريما عن الحفل الذي حصل في الفروم دو بيروت وحصد اشادات واسعة من قبل عدد كبير من النجوم، وتصدّرت هاشتاغات (اليسا، بنت الجيران، حنا السكران) الترند على تويتر لبنان.
يذكر أن حفل "ليلة أمل"، هو أكبر حفل موسيقي مجاني في لبنان والعالم العربي، جمع خمسين موسيقياً من أبرز أعضاء الأوركسترا الفيلهارمونيّة اللبنانيّة، أضف إلى كورال "صوت الجنة" وعشرات الراقصين المُحترفين، بأضخم إنتاج فنيّ شهدته بيروت بعد إنفجار 4 أغسطس.
