في أول مداخلة منها بعد اعلانها عن اصابتها بفيروس كورونا مع وائل الإبراشي في برنامج "التاسعة" أكدت نشوى مصطفى بأنها عانت من بعض الأعراض الخميس الماضي ظناً منها بأنها كانت تعاني من "برد عادي" إلى أن تطور الأمر إلى آلام لا تحتمل في جسمها لتتبين إصابتها بفيروس كورونا يوم الثلاثاء.
وتابعت "أولادي جابولي دكتور في البيت، وطلب أشعة مقطعية، واكتشفنا يوم التلات أنها كورونا، والدكتور كتب لي برتوكول علاج معملش حاجة، ابتديت أتعب أكتر وجابوا لي دكتور تاني كتب لي علاج جديد...ابتديت أتعب أكتر وابتدى وشي يزرق وشفايفي تزرق ومبقتش قادرة أتنفس ولا أخد نفسي، ونزلوا يلفوا على مستشفيات، وكلهم رفضوا وقالوا مبناخدش كورونا، وابنى كلم شكاوى رئاسة الوزراء، واتصل قالهم والدتي حالتها صعبة وعندها كورونا، وبنتى اتصلت بـ105 وقالت لهم أمي بتموت وعندها كورونا.."
ويبدو أن تدخل أشرف زكي ساهم في تسريع الموضوع لتنقل إلى مستشفى العجوزة،: "أنا عايزة أقولك أنا مع ناس هنا من أهل الجنة، والعاملين فى المستشفى، من أهل الجنة وبينجوني من الموت، والناس هنا من أقل عامل نظافة وتعقيم للسيد طارق مدير المستشفى محسسيني إني أبسط حاجة وأني هخف وبيطمنوني".
حالة نشوى على ما يبدو بدأت بالتحسن متابعة ببعض النصائح للجمهور: "عايزة أقول حاجة يمكن الناس تستفيد، أنا أهملت، وفي أول ما الكورونا ظهرت، كنت ملتزمة ومكنتش بقلع الكمامة، ومكنتش بخرج من البيت نهائي إلا للضرورة، وعلى طول كنت ماشية بالصابونة والكحول، وبقالي 3 شهور أهملت وبقيت بخرج من غير ما يهمني المكان ولا الزحمة".
