لا يزال قرار تفعيل حق الأداء العلني يثير حالة من الجدل داخل الوسط الفني المصري، وذلك بعد موافقة مجلس الشيوخ المصري على الاقتراح الذي تقدم به ياسر جلال، وسط انقسام واضح في الآراء بين الفنانين والمنتجين. وفي أول تعليق له على الأمر، عبّر المنتج أحمد السبكي عن رفضه للقرار، مؤكداً أنه سيتعامل معه بطريقته الخاصة.
بعد موافقة مجلس الشيوخ.. أحمد السبكي يرفض المقترح ويؤكد لـ ET بالعربي: "اللي هيطلب حق الأداء العلني مش همضي معاه"
وخلال لقاء مع ET بالعربي، أجرته الزميلة دايلا أسد، ردّ أحمد السبكي على سؤال حول ما إذا كان سيحاول التواصل مع ياسر جلال لمناقشة القرار، قائلاً: "أنا أكلم الغرفة اللي أنا تابع ليها، أنا مش تابع لياسر جلال. ياسر جلال يقعد على الكرسي بتاعه ويتكلم زي ما هو عايز. ياسر جلال لا يعني لي في شيء."
"ياسر جلال شخصية أنا بحبها"
ورغم حدة موقفه من الاقتراح، حرص السبكي على التأكيد أن اعتراضه لا يحمل أي خلاف شخصي مع ياسر جلال، مضيفاً: "ياسر جلال كان بيشتغل معايا زمان مع نادية الجندي، وأنا جبته في فيلم شد أجزاء مع محمد رمضان، إنما ياسر جلال ده أنا بحبه أساساً، دي شخصية أنا بحبها."
وعندما سألته دايلا أسد إن كان يبدو منزعجاً من ياسر جلال، نفى ذلك بشكل قاطع، موضحاً أن اعتراضه يتركز على القرار نفسه وليس على صاحبه.
"ما يحكمش علينا عشان يخدم الممثلين"
واستكمل أحمد السبكي حديثه، معتبراً أن القرار يخدم الممثلين على حساب المنتجين، وقال: "ما يحكمش علينا في حاجة عشان يخدم نفسه ويخدم الممثلين. هي الممثلين ناقصة خدمة؟ النهارده الممثل بيدخل يتفق معاك، عايز أعلى أجر، وعايز كرفان بالمواصفات الفلانية، وعايزني أدي المساعد بتاعه كذا عشان غلبان. طب ما تدي له أنت، ما تعطف عليه أنت. ليه تخليني أنا أعطف عليه وهو بيساعدك أنت مش بيساعدني؟"
وأضاف مستكملاً انتقاداته: "والكوافير اديله كذا، والميك أب اديله كذا. في إيه يا جماعة؟ وفي الآخر بتطالبني بحق أداء علني. لمين؟ ليك ولا لمين؟"
موقف حاسم من التعاقدات المقبلة
وعن إمكانية التوصل إلى حل إذا ناقش الأمر مع الغرفة المختصة، كشف أحمد السبكي عن موقفه الصريح، قائلاً: "بصي، أنا اللي هيجي يشتغل معايا وهيقول لي حق الأداء العلني عشان ييجي يمضي معايا، هقوله لا، مش عايز أمضي، يمشي. مش هنمضي مع بعض."
