ردت نادية الجندي في ET بالعربي على الانتقادات والحملات السلبية التي تتعرض لها، وكشفت موقفها من التعليقات التي تستهدفها، مؤكدة أنها لا تهتم بهذه الحملات ولا تسمح لها بالتأثير عليها، خاصة مع ما وصفته بوجود أساليب غير شرعية لاستهداف الناجحين.
وقالت: "العملية هي بقت في أغراض شخصية، وفيه منافسة، مش منافسة، مش عايزة أقول منافسة لأن الحمد لله أنا ما عنديش منافسين، لكن عايزة أقول بقيت في أساليب لتدمير أي ناجح أو أساليب غير شرعية، جيوش إلكترونية مدفوعة الأجر والحاجات دي كلها، فأنا لا بهتم ولا أصلًا يعني دي أشياء مش مفروض إن هي تأثر فيا، ولا أنا أهتم بيها، ولا أصلًا بتتبعها إطلاقًا".
"الفنان لازم يحترم جمهوره"
وتحدثت نادية الجندي عن حرصها على الحفاظ على لياقتها ومظهرها، خاصة مع طبيعة الأدوار التي تقدمها والتي تتطلب مجهودًا بدنيًا وأداءً في مشاهد الأكشن، مؤكدة أن ذلك جزء من احترامها لجمهورها وطبيعة مهنتها.
وقالت: "هو الفنان لازم يبقى قدوة الحقيقة، وده جزء من عملي، يعني ما ينفعش إن أنا أعمل أدوار فيها أكشن وفيها مجهود وفيها لياقة بدنية إلا إذا كنت أنا فت وفي الشكل اللائق، عشان أحترم جمهوري فجمهوري يحترمني".
وأضافت: "ده جزء من عملي، ودي حاجة مفروغ منها، لازم طول الوقت، وطبعا ده أنت بتدفع ثمنه إنك تحافظ على طول وتحرم نفسك من حاجات كتير، فدي برضه من ضمن تضحيات المهنة".
"أنا ست متصالحة مع نفسي"
وعن علاقتها بنفسها وثقتها في مشوارها الفني، قالت نادية الجندي: "أنا ست متصالحة مع نفسي، ما عنديش غل وما عنديش حقد، والحمد لله عندي حب الجمهور والنجاح اللي وصلت له، وثقتي بنفسي وبجمهوري وبربنا قبل كل شيء، ده بيخليك على طول في الحالة اللي أنا، أنت شايفني فيها دي".
نادية الجندي عن التكريم "بيحسس الفنان إنه كان ماشي في الطريق الصح"
وعن التكريم في مهرجان القاهرة للسينما الفرنكوفونية، أعربت نادية الجندي عن سعادتها وفخرها، مؤكدة أنه يمثل تقديرًا لمشوار الفنان وما قدمه خلال سنوات عمله.
وقالت: "سعيدة جدًا طبعا وفخورة، يعني التكريم شيء جميل جدًا بيسعد الفنان وبيحسسه بقيمته وبمجهوده، وإنه كان ماشي في الطريق الصح، وإنه ما تنازلش وضحى كتير وتحمل تحديات كبيرة قوي".
وأضافت: "مشوار الفن مشوار صعب أوي أوي، وإنك تستمر في النجاح ولسنوات طويلة دي عملية صعبة أوي، مش أي حد ممكن يتحملها إلا إذا كان فعلا بيعشق الفن".
