تصدر اسم رضوى الشربيني الترند بعدما كشفت عن ممرض قام بالتحرش بفتاة تُدعى ياسمين كانت تخضع لعملية جراحية في إحدى المستشفيات الشهيرة.
وقالت رضوى في فيديو شاركته على صفحتها على انستقرام كانت بصحبتها ياسمين: "الحكاية باختصار ان ياسمين كان عندها مشكلة صحية، المشكلة الصحية أدت انها تدخل المستشفى يوم واحد. دخلت المستشفى بتشخيص غلط وقالولها اتكلي على الله، انت كويسة وما فيش مشكلة بعد ما عملت التحاليل اللازمة".
المستشفى رفضت استبدال الممرض بممرضة
وتابعت: "كان في دكتور كتر ألف خيره وعنده ضمير بص على الاشعة والتحاليل بتاعتها وكلمها وقالها تعالي.. جت ودخلت المستشفى كانت الزايدة بتاعتها انفجرت للأسف الشديد والدكتور المحترم عملها العملية".
لم تنته القصة هنا، بل استكملت رضوى الشربيني القصة التي حصلت مع ياسمين "عملت العملية وفوجئت ان الممرض الموجود رجل مش بنت، طلبت من المستشفى انه تغير الولد ببنت، المستشفى ما ركزتش ولم تنصاع للكلام بتاعها ومش مهم الكلام اللي هي قالته".
ثم راحت ياسمين تتحدث بالتفصيل عما حدث معها، وقالت: "قبل ما أطلب ان هم يغيرولي الولد، كنت عايزة أدخل تواليت فقلت له راح جبلي حاجة شبه القزازة، كان في ناس صحابي معايا في الأوضة، حاول يحطلي حاجة زي القزازة اللي هي بتاعت الولاد مش البنات، ساعتها هو رفع الغطا علشان يحطهالي فشاف جسمي"، وتابعت ياسمين موضحةً: "أنا ايه اللي خلاني أوافق على ده، هو جيه قالي أنا واحدة لسه خارجة من البنج لو ما عملتيش كده حتعملي على نفسك ومش حنعرف تغيرلك".
وتابعت "أنا ناديت على الممرضة علشان قعدت أعيط فقالت لي دي بتاعت الولاد مش بتاعتك، بتاعت البنات حاجة تانية خالص مش بنكشف عليكي.. طلبت ان أنا أغيره قالولي ما عندناش بنات.. في نفس اليوم كان عايز يديني مخدر ما رضيتش استحملت وجع العملية اللي كان صعب جداً كانت الساعة 11، والكلام على الساعة 6 صحابي عملولي عيد ميلادي بعد كده راح قال ما ينفعش حد يفضل في الأوضة ولازم كله يمشي.. مشى كل البنات ما عدا المرافقة".
المتحرش سيرفع قضية رد شرف
ولفتت رضوى الشربيني إلى أن الممرض دخل ليغير لياسمين على الجرح، وقالت "دخل قالها لياسمين أنا عايز أغيرلك على الجرح بتاعك، الدكتور المسؤول عن حالة ياسمين قال ان الكلام ده غلط وان هو أصلاً ما قالش ان حد يغير على الجرح لأن أصلاً مش المفروض انه يتغير على الجرح في التوقيت ده لياسمين نظراً لحالتها".
وتابعت مشيرةً إلى أن مكان الجرح كان أسفل البطن، وبعدما طلب من صديقتها الخروج من الغرفة لسبب ما، ثم بدأ بالتحرش للأسف الشديد".
وأشارت رضوى إلى أن ياسمين أبلغت إدارة المستشفى وبلغت عنه الشرطة، وتابعت "جت النيابة وتم التحفظ على الممرض، وللأسف الشديد لأن ربنا وقعها بمحامي لم يهتم بقضية ياسمين، فبالتالي الولد ما أخدش حكم ودلوقتي هو بقول أنه حيرفع عليها قضية رد شرف".
لم تذكر رضوى الشربيني الممرض ولا اسم المستشفى التي أشارت إلى أنها مستشفى كبيرة ومعروفة.
وناشدت رضوى الشربيني كل الجهات التي يمكن أن تساعد المرأة ومجلس القومي للمرأة، والنائب العام وكل من يستطيع أن يساند ياسمين وأن تسترجع حقها من الممرض والمستشفى.
من ناحيتها شكرت ياسمين رضوى وكل من ساندها في إيصال صوتها وقصتها من أجل استرجاع حقها.
وكانت ياسمين قد شاركت فيديو ناشدت فيه كل من يسمعها بأن يساعدها كي تأخذ حقها من المتحرش، وروت القصة كاملة في فيديو وكذلك في تعليق على صفحتها على انستقرام متحدثة عما حصل لها.
